الماتى وبلىسى ىلە اۋدانىنىڭ بۇرىنعى اكىمى باعدات قاراسايەۆقا قاتىستى قىلمىستىق ءىس سوتقا جولداندى – ءىس قازاقستان رەسپۋبليكاسى قىلمىستىق كودەكسىنىڭ جەتى بىردەي بابى بويىنشا قارالادى، دەپ حابارلايدى Dalanews.kz.

"قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەتتىڭ) الماتى وبلىسى بويىنشا دەپارتامەنتى قاراسايەۆ ب.ءا. مەن باسقا دا تۇلعالارعا قاتىستى سوتقا دەيىنگى تەرگەپ-تەكسەرۋ امالدارىن اياقتادى. قىلمىستىق ءىس مىنا باپتار بويىنشا قوزعالدى: 189-باپ – سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ، 190-باپ – الاياقتىق، 324-باپ – شارۋاشىلىق نەمەسە وزگە دە قىزمەتكە قويىلاتىن ەكولوگيالىق تالاپتاردى بۇزۋ، 361-باپ – لاۋازىمدىق وكىلەتتىكتەردى تەرىس پايدالانۋ، 362-باپ – بيلىكتى نەمەسە لاۋازىمدىق وكىلەتتىكتەردى اسىرا پايدالانۋ، 364-باپ – كاسىپكەرلىك قىزمەتكە زاڭسىز ارالاسۋ، 369-باپ – قىزمەتتىك جالعاندىق"، – دەپ حابارلادى الماتى وبلىستىق پروكۋراتۋراسىنىڭ باسپا ءسوز قىزمەتى سارسەنبى كۇنى قازتاگ رەداكسياسىنا.

قاداعالاۋشى ورگاننىڭ مالىمەتىنشە، قىلمىستىق ءىس 31 ناۋرىزدا الماتى وبلىسى ىلە اۋداندىق سوتىنا ءمانى بويىنشا قاراۋ ءۇشىن جولدانعان.

"قاراسايەۆ ب.ءا.-گە قاتىستى بۇلتارتپاۋ شاراسى رەتىندە قاماۋعا الۋ ءتۇرى تاڭدالعان"، – دەپ تولىقتىردى پروكۋراتۋرا.

ەسكە سالايىق، 2024 جىلى 4 قىركۇيەكتە قاراسايەۆتىڭ ۇستالعانى بەلگىلى بولدى.

باعدات قاراسايەۆ ىلە اۋدانىن 2018 جىلعى قىركۇيەكتەن باستاپ باسقاردى. وعان دەيىن الماتى وبلىسى اكىمىنىڭ كەڭەسشىسى، تالدىقورعان قالاسىنىڭ اكىمى، سونداي-اق وبلىس اكىمدىگى اپپاراتىنىڭ باسشىسى قىزمەتتەرىن اتقارعان.

ىلە اۋدانىنىڭ اكىمشىلىك ورتالىعى – الماتى ىرگەسىندەگى وتەگەن باتىر كەنتى (گرەس). اۋدان اۋماعىنان بىرنەشە تەمىرجول جەلىلەرى مەن اۆتوكولىك جولدارى وتەدى، مۇندا كوپتەگەن لوگيستيكالىق حابتار مەن تەمىرجول تۇيىقتارى ورنالاسقان. ولاردىڭ اراسىندا "سوڭعى كيلومەتر" دەپ اتالاتىن ينفراقۇرىلىم دا بار. وسى فاكتورلاردىڭ اسەرىنەن ىلە اۋدانى الماتى وبلىسىنداعى ەڭ باي اۋدانداردىڭ ءبىرى سانالادى جانە ءوڭىر بيۋدجەتىنە ەداۋىر ۇلەس قوسىپ كەلەدى.