بۇگىن وسكەمەن اۋەجايىندا استانادا وتكەن جەڭىس پارادىنا قاتىسىپ قايتقان شىعىسقازاقستاندىق ارداگەرلەردى سالتاناتتى تۇردە قارسى الۋ ءراسىمى ءوتتى،- دەپ حابارلايدى Dalanews.kz
ۇشاق اۋەدە كەلە جاتقاندا-اق، اۋە كەمەسىنىڭ كومانديرى جولاۋشىلارعا بورتىنا جەڭىس قاھارماندارى وتىرعانىن حابارلادى. بۇل حابار جولاۋشىلاردىڭ ەشقايسىسىن بەي-جاي قالدىرعان جوق. سەبەبى ولاردىڭ ءارقايسىسى - ۇلى ەرلىكتىڭ سيمۆولى، حالقىمىزدىڭ وتكەن تاريحىنىڭ كۋاگەرى.
وسكەمەن اۋەجايىندا ارداگەرلەردى وركەستر، گۇل شوقتارى، قوشەمەت پەن سىيلىقتارمەن قارسى الدى. كەيىن ءارقايسىسى قالالار مەن اۋدانداردا قۇرمەت كورسەتىلىپ، كورتەجبەن الىپ ءجۇرىلدى - بۇل شىعىسقازاقستاندىقتاردىڭ ناعىز باتىرلارىن قارسى الۋ سالتىنا اينالعان ءداستۇر.
– قۇرمەتتى ارداگەرلەر مەن تىل ەڭبەككەرلەرى! سىزدەردى شىن جۇرەكتەن جەڭىس كۇنىمەن قۇتتىقتايمىن! سىزدەرگە العىسىم مەن شەكسىز قۇرمەتىمدى ءبىلدىرۋ مەن ءۇشىن ۇلكەن مارتەبە. سىزدەردەي جانداردىڭ ارقاسىندا ءبىز بەيبىت اسپان استىندا ءومىر ءسۇرىپ، بولاشاعىمىزدى قۇرىپ، ۇرپاعىمىزدى پاتريوتتىق رۋحتا تاربيەلەپ كەلەمىز. سىزدەردىڭ ەرلىكتەرىڭىز ەشقاشان ۇمىتىلمايدى، – دەدى وبلىس اكىمى نۇرىمبەت ساقتاعانوۆ.
پارادقا قاتىسۋشىلاردىڭ قاتارىندا – سوعىس جولدارىنان وتكەن، ليتۆا مەن بەلارۋستى ازات ەتكەن، كونيگسبەرگتى الۋ شايقاسىنا قاتىسقان قۇرمات راحيم ۇلى راحيموۆ بار. جەڭىستەن كەيىن ول وداق شەكاراسىندا قىزمەتىن جالعاستىرىپ، كەيىن وبلىستىق ءىىب باستىعىنىڭ ورىنباسارى بولدى. ونىڭ ماراپاتتارىنىڭ قاتارىندا «جاۋىنگەرلىك ەرلىگى ءۇشىن»، «اسكەري ەڭبەگى ءۇشىن»، «گەرمانيانى جەڭگەنى ءۇشىن» وردەندەرى مەن مەدالدارى بار.
ونىمەن بىرگە تىل ەڭبەككەرلەرى دە بار. سولاردىڭ ءبىرى - يۋريي ۆاسيليەۆيچ نوۆولوسكيي. ول نەبارى التى جاسىندا فەرمادا جۇمىس ىستەگەن. ۇشقىش بولۋدى ارمانداعانىمەن، قۋعىن-سۇرگىنگە ۇشىراعان وتباسىنان شىققانى وعان كەدەرگى بولدى. ءبىراق ول ءومىر بويى ادال ەڭبەك ەتىپ، قىلمىستىق ىزدەستىرۋ سالاسىندا جۇمىس ىستەپ، ەكى ۇلىن تاربيەلەپ ءوسىردى.
كۇلزاگي اليحانوۆا – 35 جىلىن ۇستازدىققا ارناعان، ورلوۆ مەكتەبىنىڭ اياۋلى ءمۇعالىمى. ول بەس بالانىڭ عانا ەمەس، بۇكىل اۋىل بالالارىنىڭ «ەكىنشى اناسى» اتانعان، بار عۇمىرىن ءبىلىم مەن تاربيەگە ارناعان جان.
ەلەنا ۆلاديميروۆنا ستۋپاك بالا كەزىنەن كولحوزدا جۇمىس ىستەپ، كەيىن وسكەمەندەگى پەداگوگيكالىق تەحنيكۋمدى ءتامامداعان. قاراپايىم، ەڭبەكقور، رۋحى مىقتى جان - ءدال وسىنداي ايەلدەردى تىلدىڭ تىرەگى دەپ اتاعان.
ولاردىڭ ءارقايسىسى – تاريحتىڭ ءبىر بولشەگى، ۇلى جەڭىسكە اپارعان جولدىڭ ءتىرى كۋاسى. بۇگىنگى گۇل مەن قوشەمەت – ولاردىڭ ەرلىگىنە دەگەن شەكسىز ريزاشىلىقتىڭ ءبىر كورىنىسى عانا. سەبەبى بولاشاق - وسىنداي جانداردىڭ ارقاسىندا.
