7 مامىر – وتان قورعاۋشى كۇنىنە وراي باتىس قازاقستان وبلىسىنىڭ اكىمى ناريمان تورەعالييەۆ ءوڭىر تۇرعىندارىن ايتۋلى مەرەكەمەن قۇتتىقتاپ، اسكەري قىزمەتكەرلەر، قۇقىق قورعاۋ سالاسىنىڭ ماماندارى جانە ەل تىنىشتىعىن كۇزەتىپ جۇرگەن بارشا ازاماتتارعا جىلى لەبىزىن ءبىلدىردى،- دەپ حابارلايدى Dalanews.kz

“اتا-بابالارىمىز اماناتتاعان قاسيەتتى جەرىمىزدىڭ تىنىشتىعى مەن تاۋەلسىزدىگىمىزدىڭ تۇعىرلى بولۋى – ءار ازاماتتىڭ اسىل پارىزى. پرەزيدەنتىمىز، ق ر قارۋلى كۇشتەرىنىڭ جوعارعى باس قولباسشىسى قاسىم-جومارت كەمەل ۇلى توقايەۆ اتاپ وتكەندەي، «ارميا – مەملەكەتتىگىمىزدىڭ مىزعىماس تىرەگى، تاۋەلسىزدىگىمىزدىڭ كەپىلى. وتان قورعاۋ – قاسيەتتى پارىز ءارى مارتەبەلى مىندەت». بۇل – ەل قورعاۋ ءىسىنىڭ ماڭىزدىلىعىن ايشىقتايتىن تەرەڭ ويلى ءسوز، – دەدى ءوڭىر باسشىسى.

وبلىس اكىمى ءوز قۇتتىقتاۋىندا مەملەكەت باسشىسىنىڭ وتان قورعاۋشىلارعا جانە اسكەري قىزمەتكەرلەرگە كورسەتىپ وتىرعان ايرىقشا قۇرمەتىنە دە نازار اۋداردى:

"اعىمداعى جىلدىڭ 14 ساۋىرىندە مەملەكەت باسشىسى حالىقارالىق بىتىمگەرلىك ميسسيالارعا قاتىسقان اسكەري قىزمەتشىلەرمەن كەزدەسىپ، ولاردىڭ ەڭبەگىنە جوعارى باعا بەردى. قازاقستاندىق بىتىمگەرلەر بىرىككەن ۇلتتار ۇيىمىنىڭ اياسىندا 2014 جىلدان بەرى 700-گە جۋىق ساربازبەن ءتۇرلى حالىقارالىق وپەراسيالارعا قاتىسىپ، ەل ابىرويىن اسقاقتاتىپ كەلەدى.

كەشە عانا اقوردا تورىندە وتان قورعاۋشىلار كۇنىنە وراي وتكىزىلگەن سالتاناتتى جيىندا مەملەكەتتىك ناگرادالار تاپسىرىلدى. بۇل – مەملەكەت تاراپىنان كورسەتىلگەن زور قۇرمەت، جوعارى باعالاۋ"، – دەدى ناريمان تورەعالييەۆ.

ورال قالاسىنداعى «اتامەكەن» ونەر ورداسىندا وتكەن سالتاناتتى جيىندا سونداي-اق، وبلىس باسشىسى قىزمەتتە ەرەكشە كوزگە تۇسكەن، جەتىستىكتەرىمەن تانىلعان ازاماتتارعا قۇرمەت كورسەتىپ، العىس حاتتارمەن ماراپاتتادى.

شارا پاتريوتتىق رۋحتى كوتەرگەن اسەرلى كونسەرتپەن قورىتىلاندى.