ارمەنيا پرەمەر-مينيسترى نيكول پاشينيان وپپوزيسيالىق «ارمەنيا» فراكسياسىنىڭ دەپۋتاتى اننا گريگورياننىڭ ءسوز بوستاندىعى مەن جەمقورلىققا قاتىستى جاريالانىمدار جايلى قويعان سۇراعىنا جاۋاپ بەرگەن كەزدە ءوزىن ۇستاي الماي، ەموسياعا بەرىلدى، دەپ حابارلايدى Dalanews.kz.
ۇكىمەت ساعاتى بارىسىندا دەپۋتات اننا گريگوريان ۇكىمەتتى توقتاۋسىز جالعاسىپ جاتقان جەمقورلىق داۋلارى، قارىزدار جانە كوماندا ىشىندەگى جاۋاپسىزدىق ءۇشىن سىنعا الدى.
"شىنىمدى ايتسام، باق-تا كۇن سايىن جەمقورلىقتىڭ جاڭا فاكتىلەرى شىعىپ جاتقاندا، نە ءۇشىن ماقتانۋعا بولاتىنىن ءالى تۇسىنبەيمىن. ەگەر وسى جەمقورلىق فاكتىلەرى اشكەرەلەنسە، سول كەزدە عانا ماقتانۋعا بولار ەدى"، — دەدى دەپۋتات.
وعان جاۋاپ رەتىندە پاشينيان بىلاي دەدى:
"ەگەر ءبىز باسپاسوزدەگى ماقالالارعا سۇيەنسەك، ءسىزدى باياعىدا دارعا اسىپ، ارمەنيادان قۋىپ جىبەرەر ەدىك. ءسىز تۋرالى باسپا ءسوز نە جازىپ جاتىر، نەگە ءالى بوستاندىقتا ءجۇرسىز؟ ءسىز تۋرالى «شەتەلدىك تىڭشى» دەپ جازىپ جاتىر. وندا ءسىز بۇل زالدا نە ىستەپ وتىرسىز؟ ەگەر مەن باسپاسوزدەگى جازبالارعا سۇيەنسەم، ءسىزدى ۇلتتىق قاۋىپسىزدىك قىزمەتىنىڭ جەراستى تۇرمەسىنە تاستايمىن. سەن ءبىرىنشى بولىپ سوندا كەتۋىڭ كەرەك، كەتەسىڭ دە.
باسپا ءسوز ءسىز تۋرالى «شەتەلدىك اگەنتتەر»، «بەسىنشى كولوننا»، «ىقپال اگەنتتەرى» دەپ جازىپ جاتىر. وتىر، تىنىش وتىر، جۇيكەمدى توزدىرما. مەن ساعان ايتتىم عوي: اۋزىڭدى جاپ تا، تىنىش وتىر!" — دەپ اشۋلانا جاۋاپ بەردى پاشينيان.
وسىدان كەيىن زالداعى جاعداي شيەلەنىسىپ، ايقاي-شۋ باستالدى. ارمەنيا ۇلتتىق جينالىسىنىڭ سپيكەرى تىكەلەي ەفيردى ءوشىرىپ تاستادى.
