ەلىمىزدە جاستار اراسىنداعى جۇمىسسىزدىقتىڭ دەڭگەيى 3،1%-دى قۇراسا، ەڭ تومەنگى كورسەتكىشتەردىڭ ءبىرى تۇركىستان وبلىسىنا تيەسىلى. تۇركىستان وبلىسىندا جاستار سانى 671 مىڭنان اسادى. ولاردىڭ 500 مىڭنان استامى اۋىلدا تۇرادى. وبلىس كولەمىندە مەملەكەتتىك جاستار ساياساتىن جۇزەگە اسىرۋ ماقساتىندا 6 مىڭنان استام ماڭىزدى ءىس-شارا وتكىزىلگەن. ناتيجەسىندە وتكەن جىلى 8 مىڭعا جۋىق جاس تۇراقتى جۇمىسقا تۇردى. بيىل دا بۇل باعىتتاعى جۇمىستارعا باسىمدىق بەرىلمەك،- دەپ حابارلايدى Dalanews.kz
وڭىردە NEET ساناتىنداعى جاستاردىڭ ۇلەسى وتكەن جىلدىڭ قورىتىندىسىمەن سالىستىرعاندا 6،4%-عا تومەن. بۇل كورسەتكىشتى 2025 جىلى 30%-عا تومەندەتۋ كوزدەلىپ وتىر. NEET – بۇل 16-24 جاس ارالىعىنداعى جۇمىس جانە وقۋ ورنى جوق جاستار. ولاردىڭ ۇلەسىن ازايتۋ ماقساتىندا 13 مەملەكەتتىك باعدارلامانى قامتيتىن جول كارتاسى ازىرلەنگەن. وڭىردە NEET جاستارىنىڭ دەرەكتەر بازاسى قۇرىلىپ، ولاردىڭ ماسەلەسىن شەشۋ جولدارى قاراستىرىلدى.
سونداي-اق، وڭىردە «وتباسىنىڭ سيفرلىق كارتاسى» جوباسى ىسكە قوسىلدى. وبلىستا جاستاردى جۇمىسپەن قامتۋ جانە وقىتۋ شارالارى بەلسەندى جۇرگىزىلىپ جاتىر. «سەرپىن-2050» جوباسى بويىنشا ەلىمىزدىڭ سولتۇستىك وڭىرلەردەگى 17 جوعارى وقۋ ورىندارىنا 2024 جىلى 802 تۇلەك گرانتقا تۇسكەن. تۇركىستان وبلىستىق پوليسيا دەپارتامەنتىنىڭ مالىمەتىنە سايكەس، كامەلەت جاسىنا تولماعان جاستار اراسىنداعى ورىن العان قىلمىستار وتكەن جىلمەن سالىستىرعاندا 10 وقيعاعا ازايعان.
وبلىستىڭ ءبىلىم بەرۋ ۇيىمدارىندا ارنايى بالالارعا قاتىستى ءتۇرلى جاعدايلاردىڭ الدىن الۋ ماقساتىندا 1 143 مەكتەپكە «111-QR» سەنىم كودتارى ورناتىلعان. وبلىس بويىنشا 127 ۆولونتەرلىك ۇيىم جانە ۆولونتەرلىك 36 جەلى فرونت-وفيستەرى جۇمىس ىستەيدى. Qazvolunteer.kz ۇلتتىق ۆولونتەرلىك ۇيىمىنا 17 مىڭنان استام بەلسەندى جاس مۇشە.
