حالىقارالىق «ۇلى دالا جورىعى» مارافون-بايگەسىنىڭ بۇل جولعى ۇرانى بولەك. ءدۇبىرلى دودا اتا-بابالار رۋحىنا تاعزىم جانە ەرلىگىنە باس يۋ ماقساتىندا جەڭىستىڭ 80 جىلدىعىنا ارنالىپ وتىر،- دەپ حابارلايدى Dalanews.kz
باۋىرجان مومىش ۇلى باستاعان باتىر بابالارىمىز ءبىلىم مەن بىلەكتىڭ كۇشىمەن ۇلى وتان سوعىسىندا اسقان ەرلىك كورسەتىپ، قازاق حالقىنىڭ كوزسىز باتىلدىعىن الەمگە پاش ەتتى. ولار ۇلى دالانىڭ ەركىن ازاماتتارى جانە ەلى مەن جەرىن شىن سۇيگەن تۇلعا ەدى.
تاريحي دەرەكتەردە جاۋعا قارسى شاپقان جۇيرىكتەر تۋرالى دا جازىلادى. ماسەلەن باتىر باۋىرجان اقبوز اتىمەن ەرلىك كورسەتىپ، ءوزىنىڭ سەرىگى تۋرالى ايتقانى بار. «مەن اتباپتار قازاقتىڭ بالاسىمىن. جىلقى جۇيرىگىن ايتپاي تانيمىن. ەگەر مەن بىلسەم، بۇل – قازاقتىڭ قارابايىر جىلقىسى. ەركىن دالادا قۇيىنمەن جارىسا، كوسىلە وسكەن، كەڭ تىنىستى جانۋار. كۇن-تۇن شاپساڭ تالمايدى، ءوزى اقبوز ەكەن».
اقبوزدان قالعان تۇقىمدار قازىرگى قازاقتىڭ تاقىمىندا. ولار بەيبىت كۇننىڭ جارشىسى، بەيبىت كۇننىڭ جۇيرىگى. سول جۇيرىكتەردىڭ شابىسى مەن جارىسىن 9-14 مامىر ارالىعىندا كورە الاسىزدار.
500 شاقىرىمدىق مارافون-بايگە ۇزدىك جىلقى تۇقىمىن انىقتايدى جانە شاباندوزداردىڭ شىدامىن شىڭدايدى. شەت ەلدەردەن كەلەتىن 7 كوماندا (رەسەي، وڭتۇستىك افريكا، ماجارستان، يران، قىرعىزستان جانە ت.ب) وتاندىق 13 كوماندامەن بىرگە ب ا ق سىنايدى.
مارافون باعىتى قازاقستاننىڭ كوركەم جانە تاريحي ماڭىزى زور وڭىرلەرىن قامتيدى. اتتى شاباندوزدار الماتى – وسكەمەن تاس جولىنداعى باقاناس كوپىرىنەن باستاۋ الىپ، كونايەۆ قالاسىنىڭ «قارلىعاش» شاعىن اۋدانىندا مارەگە جەتەدى. شەتەلدىك قوناقتار ءۇشىن ەتنواۋىلدار، فوتوزونالار جانە ينتەراكتيۆتى الاڭدار ۇيىمداستىرىلادى. وسىلايشا «ۇلى دالا جورىعى» تەك جارىس الاڭى عانا ەمەس، حالىقتار اراسىنداعى مادەني بايلانىس پەن دوستىقتىڭ جانە ەرلىكتىڭ الاڭىنا اينالدى.
