Halyqaralyq «Uly dala joryǵy» marafon-báıgesiniń bul jolǵy urany bólek. Dúbirli doda ata-babalar rýhyna taǵzym jáne erligine bas ıý maqsatynda Jeńistiń 80 jyldyǵyna arnalyp otyr,- dep habarlaıdy Dalanews.kz

Baýyrjan Momyshuly bastaǵan batyr babalarymyz bilim men bilektiń kúshimen Uly Otan soǵysynda asqan erlik kórsetip, qazaq halqynyń kózsiz batyldyǵyn álemge pash etti. Olar uly dalanyń erkin azamattary jáne eli men jerin shyn súıgen tulǵa edi.

Tarıhı derekterde jaýǵa qarsy shapqan júırikter týraly da jazylady. Máselen Batyr Baýyrjan aqboz atymen erlik kórsetip, óziniń serigi týraly aıtqany bar. «Men atbaptar qazaqtyń balasymyn. Jylqy júırigin aıtpaı tanımyn. Eger men bilsem, bul – qazaqtyń qarabaıyr jylqysy. Erkin dalada quıynmen jarysa, kósile ósken, keń tynysty janýar. Kún-tún shapsań talmaıdy, ózi aqboz eken».

Aqbozdan qalǵan tuqymdar qazirgi qazaqtyń taqymynda. Olar beıbit kúnniń jarshysy, beıbit kúnniń júırigi. Sol júırikterdiń shabysy men jarysyn 9-14 mamyr aralyǵynda kóre alasyzdar.

500 shaqyrymdyq marafon-báıge úzdik jylqy tuqymyn anyqtaıdy jáne shabandozdardyń shydamyn shyńdaıdy. Shet elderden keletin 7 komanda (Reseı, Ońtústik Afrıka, Majarstan, Iran, Qyrǵyzstan jáne t.b) otandyq 13 komandamen birge baq synaıdy.

Marafon baǵyty Qazaqstannyń kórkem jáne tarıhı mańyzy zor óńirlerin qamtıdy. Atty shabandozdar Almaty – Óskemen tas jolyndaǵy Baqanas kópirinen bastaý alyp, Konaev qalasynyń «Qarlyǵash» shaǵyn aýdanynda márege jetedi. Sheteldik qonaqtar úshin etnoaýyldar, fotozonalar jáne ınteraktıvti alańdar uıymdastyrylady. Osylaısha «Uly dala joryǵy» tek jarys alańy ǵana emes, halyqtar arasyndaǵy mádenı baılanys pen dostyqtyń jáne erliktiń alańyna aınaldy.