تۇتاس الماتى وبلىسىندا 8 اي ىشىندە ينۆەستيسيا اعىنى 19%-عا ۇلعايدى، ونىڭ جالپى قۇنى 320 ملرد تەڭگەدەن اسىپ تۇسەدى. وبلىس اكىمىنىڭ سوزىنە سەنسەك، جىل باسىنان بەرى وبلىستا 54،2 ملرد. تەڭگەنىڭ 10 ءىرى ينۆەستيسيالىق جوباسى جۇزەگە اسىرىلىپ، 700-گە جۋىق جۇمىس ورنى اشىلدى.
ەڭ ءىرى جوبالار – «ناۋرىز اگرو» اسىل تۇقىمدى قۇس رەپرودۋكتورى، «اليۋگال» قورىتپالارىنان قۇرىلىس ماتەريالدارىن شىعاراتىن زاۋىت، «مەديكال حولدينگ Sintez-KZ» مەديسينالىق تيتان يمپلانتاتتارى مەن ترەناجەرلار ءوندىرىسى جانە «قاراساز اگرو» بالىق شارۋاشىلىعى جانە ت.ب.
سونىڭ ىشىندە ەڭبەكشىقازاق اۋدانىنىڭ ەكونوميكاسىن دامىتۋعا 26 ملرد تەڭگەگە جۋىق ينۆەستيسيا تارتىلعان، بۇل وتكەن جىلمەن سالىستىرعاندا 1،2 ەسەگە ارتىق.
دەيتۇرعانمەن، اۋداننىڭ جالپى وبلىس كولەمىندەگى ۇلەسى 8 پايىزدان شامالى عانا ارتىق. وبلىس اكىمى وسى ورايدا، اتالعان ايماققا ينۆەستيسيا اعىنىن ارتتىرۋ قاجەتتىگىن اتاپ ءوتتى.
– بۇگىنگى كۇنى ىسكە اسقان 20 شاقتى جوبا بولسا، سونىڭ ىشىندە «جەتىسۋ ەنەرگياسى» ءجشس-نىڭ قۋاتى 60 مۆت شەلەك جەل ەلەكتر ستانسياسى جاقىندا ىسكە قوسىلعانى بارشاعا ءمالىم. جوباعا تارتىلعان ينۆەستيسيا كولەمى – 37،4 ملرد. تەڭگەنى قۇرايدى. سايكەسىنشە، 30 جۇمىس ورنى قۇرىلعان بولاتىن، – دەدى ءوز سوزىندە مارات سۇلتانعازييەۆ.
ينۆەستيسيالىق جوبالار ايماقتىڭ الەۋمەتىن جاقسارتۋعا ۇلكەن ۇلەس قوسادى دەگەن ءوڭىر باسشىسى «جەرۇيىق ەنەرگو» سەرىكتەستىگى شەلەك دالىزىندە قۋاتتىلىعى 50 مۆت جەل ەلەكتر ستانسياسىنىڭ جانە ونىمدىلىگى 7 مىڭ توننادان استام «فروسكو» جەمىس-كوكونىس ونىمدەرىن ءوندىرۋ، تەرەڭ مۇزداتۋ جانە ساقتاۋ زاۋىتىنىڭ قۇرىلىسى ءجۇرىپ جاتقانىن كەزدەسۋ بارىسىندا ءمالىم ەتتى.
ەڭبەكىشقازاق اۋدانىنداعى 4 كاسىپورىننىڭ ونىمدىلىگى وبلىستاعى ونەركاسىپ ءونىمىنىڭ 72 پايىزىن قۇرايدى. جالپى اۋدانىندا ونەركاسىپ سالاسىندا 137 كاسىپورىن جۇمىس ىستەيدى، ونىڭ 89-ى وڭدەۋ ونەركاسىبىندە، ال قالعان 48ء-ى تاۋ-كەن ونەركاسىبىندە جۇمىستارىن جالعاسىتىرىپ جاتىر. نەگىزىنەن اۋدان ونەركاسىپ ءوندىرىسى بويىنشا اۋدان 5ء-شى ورىندا تۇر.
وبلىس اكىمى اۋداننىڭ نەگىزگى ونەركاسىپتىك كاسىپورىندارى «فۋد ماستەر كومپانياسى» جانە «ادال ءسۇت» ءسۇت ونىمدەرىن وندىرەتىن زاۋىتتارىنىڭ اياق الىسىنا توقتالدى. بۇگىندە قوس زاۋىتتىڭ جۇمىس جۇكتەمەسى 90%-دان اسادى ەكەن.
سونىمەن قاتار وڭىردە شاراپ، الكوگولدىك سۋسىندار، شىرىندار شىعارۋمەن «گولد پرودۋكت» جانە «ۆينزاۆود ديونيس» سياقتى ءىرى كاسىپورىندار اينالىسادى. بۇل زاۋىتتاردىڭ جۇكتەمەسى شامامەن 30-40%-دى قۇرايدى.
– اۋدانداعى 4 كاسىپورىننىڭ ءونىم كولەمى وبلىستىڭ جالپى ونەركاسىپ ءونىمىنىڭ 72 پايىزىن نەمەسە ۇشتەن ەكىسىنە جۋىعىن قۇرايدى. سوندىقتان ءوزىمنىڭ ورىنباسارىم ارسلان داندىبايەۆقا قايتا وڭدەۋ كاسىپورىندارىن تولىق جۇكتەۋ ماقساتىندا اۋىل شارۋاشىلىعى تاۋار وندىرۋشىلەرىن قولداۋ جانە ىنتالاندىرۋ، سونىمەن بىرگە ساتۋ نارىقتارى ىزدەستىرۋ جۇمىستارىن كۇشەيتۋدى تاپسىرامىن، – دەدى مارات ەلەۋسىز ۇلى.
ەكونوميكانىڭ تۇراقتىلىعىن قامتاماسىز ەتۋدىڭ ماڭىزدى فاكتورلارىنىڭ ءبىرى شاعىن جانە ورتا بيزنەستى دامىتۋ بولىپ تابىلادى. وبلىستا 105،0 مىڭعا جۋىق شاعىن جانە ورتا بيزنەس سۋبەكتىلەرى جۇمىس ىستەپ تۇرسا، ونىڭ 21 مىڭعا جۋىعى ەڭبەكشىقازاق اۋدانىندا نەمەسە وبلىستىڭ بەستەن ءبىر بولىگى، مۇندا 34،5 مىڭ ادام جۇمىسپەن قامتىلعان.
مارات سۇلتانعازييەۆ وڭ ديناميكاعا قاراماستان، اعىمداعى جىلدىڭ قاڭتار-تامىزىندا شاعىن جانە ورتا بيزنەس سۋبەكتىلەرىنەن بيۋدجەتكە تۇسەتىن تۇسىمدەر نەبارى 1،2%-عا وسكەنىن تىلگە تيەك ەتتى. ونىڭ ايتۋىنشا، حالىق تىعىز ورنالاسقان ايماق ءۇشىن بۇل وتە از كورسەتكىش.
سوندىقتان وبلىس اكىمى، جەرگىلىكتى اتقارۋشى بيلىك حالىقتىڭ ونىڭ ىشىندە جاستار اراسىندا كاسىپكەرلىك نەگىزدەرىنە ۇيرەتۋ، شاعىن نەسيەلەر مەن گرانتتار الۋ بويىنشا ءتۇسىندىرۋ جۇمىستارىن جۇرگىزۋى قاجەتتىگىن ەسكەرتتى.
