بۇقتىرما سۋ قويماسىنداعى كوپىر جىل سوڭىنا دەيىن پايدالانۋعا بەرىلەدى، - دەپ حابارلايدى Dalanews.kz.
بۇل تۋرالى پرەزيدەنتتىڭ كەڭەسشىسى - پرەزيدەنتتىڭ باسپا ءسوز حاتشىسى بەرىك ءۋالي حابارلادى.
"وسىدان تۋرا 5 جىل بۇرىن، 19 قىركۇيەك كۇنى پرەزيدەنت قاسىم-جومارت توقايەۆ ۇكىمەت پەن شىعىس قازاقستان وبلىسى اكىمدىگىنە تۆيتتەر ارقىلى بۇقتىرما سۋ قويماسىنا كوپىر سالۋ ءۇشىن قارجى ءبولۋدى تاپسىرعان بولاتىن. قازىرگى ۋاقىتتا كوپىر قۇرىلىسى اياقتالۋعا جاقىن. ەكى بىردەي وبلىستىڭ، 6 اۋداننىڭ اراسىن جالعايتىن ستراتەگيالىق نىسان جىل سوڭىنا دەيىن پايدالانۋعا بەرىلەدى دەپ جوسپارلانىپ وتىر"، - دەيدى بەرىك ءۋالي.
ونىڭ سوزىنشە، بۇل كوپىر جەرگىلىكتى تۇرعىندار ءۇشىن كوپتەن كۇتكەن قۋانىش، سۇيىنشىلەيتىن ۇلكەن جاڭالىق بولماق.
"ويتكەنى شىعىس قازاقستان مەن اباي وبلىستارىنىڭ مارقاكول، كۇرشىم، كاتونقاراعاي جانە كوكپەكتى اۋداندارىنىڭ تۇرعىندارى 50 جىل بويى جول ازابىن تارتتى. جازعى ۋاقىتتا پاروم ارقىلى، قىس مەزگىلىندە مۇز ۇستىمەن ءجۇردى. تالاي ادامنىڭ سۋعا كەتكەنى دە جاسىرىن ەمەس. سوندىقتان بۇل كوپىردى سالۋدىڭ ماڭىزى جوعارى ەدى.
بۇل – ەلىمىزدەگى ەڭ ۇزىن كوپىر بولماق. ەكى جولاقتى اۆتوموبيل كوپىرىنىڭ جالپى ۇزىندىعى 1316 مەتردى قۇرايدى. تاۋلىگىنە 80 مىڭ كولىككە دەيىن وتكىزە الادى. سونىمەن قاتار جوبا اياسىندا ۇزىندىعى 18،6 شاقىرىم بولاتىن كوپىرگە قوسىلاتىن جاڭا اۆتوجول قۇرىلىسى قاراستىرىلعان"، - دەيدى بەرىك ءۋالي. 
ەستەرىڭىزگە سالا كەتەيىك، 2019 جىلى 18 قىركۇيەكتە «Egemen Qazaqstan» گازەتىندە «ەلۋ جىل بۇرىنعى ەسكى پاروم ەلدى قاشانعى اۋرەگە تۇسىرەدى؟» دەگەن تاقىرىپپەن جۋرناليست ازامات قاسىمنىڭ ماقالاسى جاريالانعان بولاتىن. وسى ماقالا كوپىردىڭ سالىنۋىنا ارقاۋ بولعان ەدى.
