Buqtyrma sý qoimasyndaǵy kópir jyl sońyna deiin paidalanýǵa beriledi, - dep habarlaidy Dalanews.kz.
Bul týraly Prezidenttiń keńesshisi - Prezidenttiń baspasóz hatshysy Berik Ýáli habarlady.
"Osydan týra 5 jyl buryn, 19 qyrkúiek kúni Prezident Qasym-Jomart Toqaev Úkimet pen Shyǵys Qazaqstan oblysy ákimdigine tvitter arqyly Buqtyrma sý qoimasyna kópir salý úshin qarjy bólýdi tapsyrǵan bolatyn. Qazirgi ýaqytta kópir qurylysy aiaqtalýǵa jaqyn. Eki birdei oblystyń, 6 aýdannyń arasyn jalǵaityn strategiialyq nysan jyl sońyna deiin paidalanýǵa beriledi dep josparlanyp otyr", - deidi Berik Ýáli.
Onyń sózinshe, bul kópir jergilikti turǵyndar úshin kópten kútken qýanysh, súiinshileitin úlken jańalyq bolmaq.
"Óitkeni Shyǵys Qazaqstan men Abai oblystarynyń Marqakól, Kúrshim, Katonqaraǵai jáne Kókpekti aýdandarynyń turǵyndary 50 jyl boiy jol azabyn tartty. Jazǵy ýaqytta parom arqyly, qys mezgilinde muz ústimen júrdi. Talai adamnyń sýǵa ketkeni de jasyryn emes. Sondyqtan bul kópirdi salýdyń mańyzy joǵary edi.
Bul – elimizdegi eń uzyn kópir bolmaq. Eki jolaqty avtomobil kópiriniń jalpy uzyndyǵy 1316 metrdi quraidy. Táýligine 80 myń kólikke deiin ótkize alady. Sonymen qatar joba aiasynda uzyndyǵy 18,6 shaqyrym bolatyn kópirge qosylatyn jańa avtojol qurylysy qarastyrylǵan", - deidi Berik Ýáli. 
Esterińizge sala keteiik, 2019 jyly 18 qyrkúiekte «Egemen Qazaqstan» gazetinde «Elý jyl burynǵy eski parom eldi qashanǵy áýrege túsiredi?» degen taqyryppen jýrnalist Azamat Qasymnyń maqalasy jariialanǵan bolatyn. Osy maqala kópirdiń salynýyna arqaý bolǵan edi.
