قازاقستان اقش-قا 49 جىلعا جالعا جەر بەردى. جەر الماتى قالاسىنداعى امەريكا قۇراما شتاتتارىنىڭ كونسۋلدىق مەكەمەسىنىڭ ءۇي-جايلارىن سالۋ جانە پايدالانۋ ءۇشىن بەرىلەتىنى ايتىلعان، - دەپ حابارلايدى Dalanews.kz.
"قازاقستان رەسپۋبليكاسىنىڭ ۇكىمەتى امەريكا قۇراما شتاتتارىنىڭ ۇكىمەتىنە الماتى قالاسىنداعى اقش-تىڭ كونسۋلدىق مەكەمەسىنىڭ عيماراتىن سالۋ ءۇشىن جەر ۋچاسكەسىن جالعا بەرۋ تۋرالى كەلىسىمنىڭ جوباسى ماقۇلدانسىن"، – دەلىنگەن قازاقستان ۇكىمەتىنىڭ قاۋلىسىندا.
كەلىسىم جوباسىنا سايكەس الماتى قالاسىنداعى جاماقايەۆ كوشەسى، ءال-فارابي داڭعىلى، سەيفۋللين داڭعىلى، الدارا كوسە كوشەسىنىڭ اراسىندا ورنالاسقان جەر ۋچاسكەسى جالعا بەرىلەدى. جالداۋ مەرزىمى شارت جاسالعان كۇننەن باستاپ 49 جىل دەپ ەسەپتەلىنگەن. بۇل رەتتە جالداۋ مەرزىمى تاعى 49 جىلعا ۇزارتىلۋى مۇمكىن. ۋچاسكە اۋدانى – 70 593 شارشى مەتر.
"جالعا الۋ اقىسى (جالپى ۇزاقتىعىنا شەكتەۋسىز) 25 301 016 دوللار جانە وسى كەلىسىم كۇشىنە ەنگەن كۇننەن باستاپ 30 كۇنتىزبەلىك كۇن ىشىندە ءبىر رەتتىك تولەممەن تولەنەدى"، – دەلىنگەن كەلىسىم جوباسىندا.
