ءى.جانسۇگىروۆ اتىنداعى جەتىسۋ ۋنيۆەرسيتەتىندە «اتوم ەنەرگەتيكاسى ەلىمىزدىڭ تۇراقتى بولاشاعىنىڭ ءبىر بولىگى» تاقىرىبىندا دوڭگەلەك ۇستەل ءوتتى. وعان جەتىسۋ وبلىسى ءماسليحاتىنىڭ حاتشىسى گۇلنار تويلىبايەۆا، «AMANAT» پارتياسىنىڭ جەتىسۋ وبلىسى بويىنشا فيليالىنىڭ ءتوراعاسى ارىستانعالي ارىن جانە ءبىلىم ورداسىنىڭ عالىمدارى، وقىتۋشىلارى، قىزمەتكەرلەرى مەن ءبىلىم الۋشىلارى قاتىستى.
ءىس-شارا مەملەكەت باسشىسىنىڭ حالىققا جولداۋى اياسىندا بەرىلگەن تاپسىرمالار مەن مىندەتتەردى جۇزەگە اسىرۋعا باعىتتالدى.
جيىندى ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ باسقارما ءتوراعاسى – رەكتور ەرمەك بورىبايەۆ جۇرگىزىپ، اەس قۇرىلىسى ەلدىڭ عىلىمي-تەحنيكالىق جانە جوعارى بىلىكتى كادرلىق الەۋەتىنىڭ وسۋىنە، جەرگىلىكتى ونەركاسىپتى دامىتۋعا مۇمكىندىك بەرەتىنىن ايتتى.
گۇلنار تويلىبايەۆا ءبىلىم ورداسىنىڭ ۇجىمىنا ەلىمىز ءۇشىن اتوم ەلەكتر ستانسياسىن سالۋدىڭ ەكونوميكالىق اسپەكتىلەرىن جان-جاقتى تۇسىندىرسە، ارىستانعالي ارىن اەس سالىنسا ەلدىڭ وتىن كوزدەرىنە تاۋەلدىلىگى ازايىپ، حالىقتىڭ تۇرمىس تىرشىلىگى جاقسارا تۇسەتىنىن ايتتى. سونداي-اق جيىنعا قاتىسۋشىلاردىڭ اەس سالۋعا قاتىستى سۇراقتارىنا تولىق جاۋاپ بەرىلدى.
تاقىرىپقا وراي تەحنيكالىق فاكۋلتەت دەكانى، پەداگوگيكا عىلىمدارىنىڭ كانديداتى ءىلياس ەسەنعابىلوۆ، پسيحولوگيا عىلىمدارىنىڭ دوكتورى، پروفەسسور حاپيزا ناۋبايەۆا، فيزيكا-ماتەماتيكا عىلىمدارىنىڭ كانديداتى، پروفەسسور ايتپاي راحيمبەكوۆ، الەۋمەتتىك-شىعارماشىلىق جۇمىس جونىندەگى ءبولىم باسشىسى بارحۋدار گۋسەنوۆ، جوبالىق كەڭسە باسشىسى ميراس ابدراحيم بايانداما جاساپ، اتوم ەنەرگەتيكاسىنىڭ بۇگىنى مەن بولاشاعى جايلى ءوز ويلارىن ورتاعا سالدى.
