جەتىسۋ وبلىسىنىڭ كوكسۋ اۋدانىندا جۋىردا تازى جانە توبەت يتتەر وسىرۋگە ارنالعان ۇلتتىق ورتالىق پايدا بولادى. ورتالىقتىڭ قۇرىلىسى بارىسىمەن وبلىس اكىمى بەيبىت يسابايەۆ تانىسىپ قايتتى. اتاپ وتسەك، قازاقتىڭ تازى جانە توبەت يت تۇقىمدارىن جاڭعىرتۋعا ارنالعان بۇل كەشەننىڭ قازاقستاندا جانە تمد ەلدەرىندە بالاماسى جوق، دەپ حابارلايدى Dalanews.kz
ءوڭىر باسشىسى ورتالىقتا سالىنعان نىسانداردى ارالاپ كوردى. مۇندا 23 اكىمشىلىك عيمارات ورنالاسقان: جاتاقحانا، گاراج، جەم دايىندايتىن اس ءۇي، ۆەتەرينارلىق كلينيكا جانە يتتەردى ۇستايتىن ءۇي-جايلار بار. سونداي-اق يتتەرگە ارنالعان جۇگىرۋ جولاعى، ات قورا جانە تازى مەن توبەتتەردى اڭشىلىققا، سالت اتتى اداممەن ەرىپ جۇرۋگە ۇيرەتەتىن جابىق مانەج قاراستىرىلعان.
- بۇكىل كەشەن بۇگىنگى كۇنگە ءىس جۇزىندە دايىن، ينجەنەرلىك جەلىلەر تارتىلعان، ءقازىر اباتتاندىرۋ جۇمىستارى جۇرگىزىلۋدە. قۇرىلىستى ماۋسىم ايىنىڭ سوڭىنا دەيىن اياقتاۋ جوسپارلانعان. قازىرگى تاڭدا نىساندا 100 ادام جۇمىس ىستەپ جاتىر، — دەدى مەردىگەر ۇيىمنىڭ باسشىسى راحمەت مەدەت.
بەلگىلى بولعانداي، ورتالىقتا يت ءوسىرۋ باعىتىندا اۋقىمدى جۇمىس جۇرگىزىلمەك. مۇندا ەكولوگيا جانە تابيعي رەسۋرستار مينيسترلىگى جانىنان قۇرىلعان عىلىمي ورتالىق جۇمىس ىستەپ، الدىن الا مالىمەت بويىنشا 50 تازى، 50 توبەت تۇقىمدى يت ۇستالادى.
اتاپ وتسەك، جوبانى قارجىلاندىرۋ «استانا-20» قورىنىڭ دەمەۋشىلىك قاراجاتى ەسەبىنەن جۇزەگە اسىرىلۋدا.
