قاراعاندىدا جٷزگە جۋىق جاس «زاڭ جەنە تەرتٸپ اۋماعى» اتتى جاستار قۇقىقتىق كۆەستٸنە قاتىستى. وعان وبلىستىڭ قالا جەنە اۋداندارىنان كەلگەن ون كوماندا قاتىستى. ٸس-شارا «قۇقىق تەرتٸبٸ ەلٸپپەسٸ» جوباسى اياسىندا ۇيىمداستىرىلىپ, مەملەكەت باسشىسى ەدٸلەتتٸ قوعام قۇرۋدىڭ نەگٸزگٸ قاعيداتتارىنىڭ بٸرٸ رەتٸندە ايقىنداعان «زاڭ جەنە تەرتٸپ» يدەولوگيياسىن ٸلگەرٸلەتۋ جۇمىسىنىڭ بٸر بٶلٸگٸنە اينالدى, دەپ حابارلايدى dalanews.kz.
دەستٷرلٸ دەرٸستەر مەن دٶڭگەلەك ٷستەلدەردٸڭ ورنىنا قاتىسۋشىلارعا قۇقىق قورعاۋ ورگاندارى مەن تٶتەنشە جاعدايلار قىزمەتتەرٸنٸڭ جۇمىسىمەن تەجٸريبە جٷزٸندە تانىسۋ مٷمكٸندٸگٸ ۇسىنىلدى.
قۇقىقتىق كۆەستكە قاتىسۋشىلار الدىندا قاراعاندى وبلىسى ەكٸمٸنٸڭ ورىنباسارى ەلٸبەك ەلدەنەي سٶز سٶيلەدٸ.
— بيىل قازاقستاندىقتار رەفەرەندۋمدا جاڭا كونستيتۋتسييانى قابىلداپ, ماڭىزدى تاڭداۋ جاسادى. ونىڭ باستى قاعيداتتارىنىڭ بٸرٸ – «زاڭ جەنە تەرتٸپ» يدەولوگيياسى. بۇل – قاۋٸپسٸز ەرٸ ەدٸلەتتٸ قوعامنىڭ بەرٸك نەگٸزٸ. بٷگٸندە جاستاردىڭ قۇقىقتىق ساۋاتتىلىعىن ارتتىرۋعا ەرەكشە كٶڭٸل بٶلٸنٸپ وتىر. زاڭدى بٸلۋ ەڭ الدىمەن ٶز ەرەكەتتەرٸ مەن قابىلداعان شەشٸمدەرٸ ٷشٸن جاۋاپكەرشٸلٸكتٸ تٷسٸنۋدەن باستالادى. دەل وسىلاي ەربٸر ازاماتتىڭ الاڭسىز ٶمٸر سٷرٸپ, بٸلٸم الىپ, ەڭبەك ەتٸپ جەنە ٶز مٷمكٸندٸكتەرٸن تولىق جٷزەگە اسىرا الاتىن ورتاسى قالىپتاسادى, — دەدٸ ەلٸبەك ەلدەنەي.
ورتالىق ساياباقتا ٶتكەن اشىلۋ سالتاناتىندا پوليتسييا دەپارتامەنتٸنٸڭ ارنايى ماقساتتاعى جەدەل ەرەكەت ەتۋ جاساعى مەن كينولوگييالىق قىزمەتٸنٸڭ كٶرسەتٸلٸمدەرٸ ۇيىمداستىرىلىپ, ارنايى تەحنيكا كٶرمەسٸ قويىلدى.
— بٸزدٸڭ ماقساتىمىز – ازاماتتاردىڭ تىنىشتىعىن كٷزەتٸپ, ادامداردىڭ ٶمٸرٸن ساقتاپ جٷرگەن قىزمەتتەردٸڭ كٷندەلٸكتٸ ەڭبەگٸن كٶرسەتۋ. بەلكٸم, بٷگٸنگٸ ٸس-شارا سٸزدەردٸڭ بولاشاق ماماندىق تاڭداۋلارىڭىزعا ىقپال ەتەر, — دەدٸ وبلىس پروكۋرورىنىڭ ورىنباسارى ەدٸل جۇبانوۆ.
زاڭ تالاپتارىن ساقتاۋدىڭ ماڭىزدىلىعى تۋرالى قاراعاندى وبلىسى پوليتسييا دەپارتامەنتٸ باستىعىنىڭ ورىنباسارى جاسقايرات قايىروۆ تا اتاپ ٶتتٸ.
– قازٸرگٸ جاس بۋىن ٶز قۇقىقتارىن بٸلٸپ قانا قويماي, قوعام مەن مەملەكەت الدىنداعى مٸندەتتەرٸن دە تەرەڭ تٷسٸنۋٸ قاجەت. زاڭدى ساقتاۋ – ازاماتتىق كەمەلدٸكتٸڭ جەنە قۇقىقتىق مەدەنيەتتٸڭ ماڭىزدى كٶرسەتكٸشٸ, – دەدٸ ول.
جەرەبە تارتىلعاننان كەيٸن كوماندالار تاقىرىپتىق بەكەتتەر بويىنشا ساپارعا شىقتى.
العاشقى ايالداما – «قۇقىق تەرتٸبٸ اۋماعى» بەكەتٸ بولدى. مۇندا قاتىسۋشىلار پوليتسييا قىزمەتٸنٸڭ جۇمىسىمەن جاقىننان تانىستى.
ب. بەيسەنوۆ اتىنداعى قاراعاندى اكادەميياسىندا جاستارعا بولاشاق قۇقىق قورعاۋ ورگاندارى قىزمەتكەرلەرٸن دايارلاۋ ٷدەرٸسٸ كٶرسەتٸلدٸ.
مامانداندىرىلعان ٶرت سٶندٸرۋ بٶلٸمٸندە جەنە جەدەل-قۇتقارۋ جاساعىندا ولار قۇتقارۋ تەحنيكاسىمەن تانىسىپ, تٶتەنشە جاعدايلار كەزٸندە ەرەكەت ەتۋ بويىنشا تەجٸريبەلٸك داعدىلاردى مەڭگەردٸ.
سونداي-اق تاعى بٸر بەكەتتە جەدەل جەردەم قىزمەتٸنٸڭ ماماندارى العاشقى مەديتسينالىق كٶمەك كٶرسەتۋ تەسٸلدەرٸن ٷيرەتتٸ. ۇلتتىق ۇلاننىڭ ەسكەري بٶلٸمٸندە قوعامدىق قاۋٸپسٸزدٸكتٸ قامتاماسىز ەتۋ مٸندەتتەرٸ مەن ەسكەري قىزمەتتٸڭ ەرەكشەلٸكتەرٸ تۋرالى اقپارات بەرٸلدٸ.
كۆەست قورىتىندىسى بويىنشا ەڭ بەلسەندٸ قاتىسۋشىلارعا العىس حاتتار مەن ەستەلٸك سىيلىقتار تابىستالدى. ۇيىمداستىرۋشىلاردىڭ پٸكٸرٸنشە, مۇنداي جوبالار جاستاردىڭ قۇقىقتىق ساۋاتتىلىعىن ارتتىرىپ قانا قويماي, زاڭ مەن تەرتٸپتٸ ساقتاۋ جولىنداعى جەكە جاۋاپكەرشٸلٸكتٸڭ ماڭىزىن تەرەڭ تٷسٸنۋگە ىقپال ەتەدٸ.
