Qaraǵandyda júzge jýyq jas «Zań jáne tártip aýmaǵy» atty jastar quqyqtyq kvestine qatysty. Oǵan oblystyń qala jáne aýdandarynan kelgen on komanda qatysty. Is-shara «Quqyq tártibi álippesi» jobasy aiasynda uiymdastyrylyp, Memleket basshysy ádiletti qoǵam qurýdyń negizgi qaǵidattarynyń biri retinde aiqyndaǵan «Zań jáne tártip» ideologiiasyn ilgeriletý jumysynyń bir bóligine ainaldy, dep habarlaidy dalanews.kz.
Dástúrli dárister men dóńgelek ústelderdiń ornyna qatysýshylarǵa quqyq qorǵaý organdary men tótenshe jaǵdailar qyzmetteriniń jumysymen tájiribe júzinde tanysý múmkindigi usynyldy.
Quqyqtyq kvestke qatysýshylar aldynda Qaraǵandy oblysy ákiminiń orynbasary Álibek Áldenei sóz sóiledi.
— Biyl qazaqstandyqtar referendýmda jańa Konstitýtsiiany qabyldap, mańyzdy tańdaý jasady. Onyń basty qaǵidattarynyń biri – «Zań jáne tártip» ideologiiasy. Bul – qaýipsiz ári ádiletti qoǵamnyń berik negizi. Búginde jastardyń quqyqtyq saýattylyǵyn arttyrýǵa erekshe kóńil bólinip otyr. Zańdy bilý eń aldymen óz áreketteri men qabyldaǵan sheshimderi úshin jaýapkershilikti túsinýden bastalady. Dál osylai árbir azamattyń alańsyz ómir súrip, bilim alyp, eńbek etip jáne óz múmkindikterin tolyq júzege asyra alatyn ortasy qalyptasady, — dedi Álibek Áldenei.
Ortalyq saiabaqta ótken ashylý saltanatynda politsiia departamentiniń arnaiy maqsattaǵy jedel áreket etý jasaǵy men kinologiialyq qyzmetiniń kórsetilimderi uiymdastyrylyp, arnaiy tehnika kórmesi qoiyldy.
— Bizdiń maqsatymyz – azamattardyń tynyshtyǵyn kúzetip, adamdardyń ómirin saqtap júrgen qyzmetterdiń kúndelikti eńbegin kórsetý. Bálkim, búgingi is-shara sizderdiń bolashaq mamandyq tańdaýlaryńyzǵa yqpal eter, — dedi oblys prokýrorynyń orynbasary Edil Jubanov.
Zań talaptaryn saqtaýdyń mańyzdylyǵy týraly Qaraǵandy oblysy Politsiia departamenti bastyǵynyń orynbasary Jasqairat Qaiyrov ta atap ótti.
– Qazirgi jas býyn óz quqyqtaryn bilip qana qoimai, qoǵam men memleket aldyndaǵy mindetterin de tereń túsinýi qajet. Zańdy saqtaý – azamattyq kemeldiktiń jáne quqyqtyq mádeniettiń mańyzdy kórsetkishi, – dedi ol.
Jerebe tartylǵannan keiin komandalar taqyryptyq beketter boiynsha saparǵa shyqty.
Alǵashqy aialdama – «Quqyq tártibi aýmaǵy» beketi boldy. Munda qatysýshylar politsiia qyzmetiniń jumysymen jaqynnan tanysty.
B. Beisenov atyndaǵy Qaraǵandy akademiiasynda jastarǵa bolashaq quqyq qorǵaý organdary qyzmetkerlerin daiarlaý úderisi kórsetildi.
Mamandandyrylǵan órt sóndirý bóliminde jáne jedel-qutqarý jasaǵynda olar qutqarý tehnikasymen tanysyp, tótenshe jaǵdailar kezinde áreket etý boiynsha tájiribelik daǵdylardy meńgerdi.
Sondai-aq taǵy bir bekette jedel járdem qyzmetiniń mamandary alǵashqy meditsinalyq kómek kórsetý tásilderin úiretti. Ulttyq ulannyń áskeri bóliminde qoǵamdyq qaýipsizdikti qamtamasyz etý mindetteri men áskeri qyzmettiń erekshelikteri týraly aqparat berildi.
Kvest qorytyndysy boiynsha eń belsendi qatysýshylarǵa alǵys hattar men estelik syilyqtar tabystaldy. Uiymdastyrýshylardyń pikirinshe, mundai jobalar jastardyń quqyqtyq saýattylyǵyn arttyryp qana qoimai, zań men tártipti saqtaý jolyndaǵy jeke jaýapkershiliktiń mańyzyn tereń túsinýge yqpal etedi.
