الداعى ايدا اەس قۇرىلىسىنا بايلانىستى رەفەرەندۋم ٶتەتٸنٸ جۇرتقا مەلٸم. ەلەمجەلٸدەگٸ قاۋىم "بۇل ناۋقان ەڭ الدىمەن ۇستازدارعا سالماق سالادى, ساياسي ناۋقان مۇعالٸمدەردٸ ەۋرە-سارساڭعا تٷسٸرەدٸ" دەگەن پٸكٸردە.
Dalanews وسى تۇستا بٸلٸم سالاسىنداعى قاعازباستىلىق پەن ناۋقانشىلىقتى اشىق سىناپ جٷرگەن جاس مامان, اقتٶبە قالاسىنداعى ورتا مەكتەپتٸڭ مۇعالٸمٸ ۇلداناي ماراتقىزىمەن پٸكٸرلەسكەن بولاتىن.
ۇلدانايدىڭ جەلٸدەگٸ پاراقشاسىندا وسىدان بٸر كٷن بۇرىن جارييالانعان ۆيدەو وقىرمان تاراپىنان قىزۋ تالقىلانۋدا. مەكتەپتەگٸ بيۋروكراتييا مەن كٶزالداۋ ٷشٸن ٶتكٸزٸلەتٸن ٸس-شارالاردان مەزٸ بولعانىن ايتقان جاس مامان جۇمىستان كەتۋگە وقتالىپ جٷرگەنٸن حابارلاعان ەدٸ.
"مۇعالٸم بولعانىما تٶرت جىلدان استى. العاش وقۋ ورداسىنا ٷلكەن شابىتپەن كەلگەنمٸن. كەلە-كەلە بۇل سالاداعى كەمشٸلٸكتەردٸ اڭعارا باستادىم. بٸزدٸڭ سالادا كٶپ دٷنيەگە كٶڭٸلٸم تولمايدى. مەن سەكٸلدٸ جاس مامانداردى قاعازباستىلىق قاجىتىپ بٸتتٸ. قانشا جەردەن ەلەكتروندى جۋرنالعا اۋىسساق تا, بەرٸن ەلەكتروندى ياكي ساندىق فورماتقا كٶشٸرسەك تە قاعازباستىلىق قىر سوڭىمىزدان قالماي قويدى. پايداسىز جينالىستار, ەشكٸم باس سۇعىپ قارامايتىن پەپكٸلەر, "سروچنىي" دوكۋمەنتتەر, اسپاننان ساپ ەتە قالاتىن تەكسەرٸس جٷيكەڭدٸ جٷندەي تٷتەدٸ”, - دەيدٸ ول.
ايتۋىنشا, مۇعالٸمدەردٸڭ كٶزگە كٶرٸنەر-كٶرٸنبەس مٸندەتتەرٸ ٶتە كٶپ. ٶكٸنٸشكە قاراي, ولاردىڭ كٶبٸ ەلەنبەي جاتادى.
“تٸپتٸ ٶز وتباسىڭا قاراۋعا, ولارمەن سٶيلەسۋگە مۇرشاڭ بولمايدى. سىنىپ جەتەكشٸسٸ بولساڭ ەكٸ باستان, ەكٸ ەسە جاۋاپكەرشٸلٸك. وقۋشىنىڭ مەكتەپكە كەلگەنٸنەن باستاپ ونىڭ قوڭىراۋداعى, ساباقتاعى قاۋٸپسٸزدٸگٸ, ٷيٸنە امان-ەسەن جەتۋٸ, جەتكەن سوڭ كەشكە بەيمەزگٸل شىعىپ كەتپەۋٸ, بوس ۋاقىتىندا نەمەن اينالىساتىنى تٸكەلەي سىنىپ جەتەكشٸسٸنٸڭ موينىندا. بىلاي قارايتىن بولساق, اتا-انانىڭ مٸندەتٸن بٸزگە ارتىپ وتىر”, - دەيدٸ ۇلداناي ماراتقىزى.
ونىڭ سٶزٸنشە, بٷگٸندە ٶزگەنٸڭ ۋاقىتىن ايالاپ, ٶزٸنٸڭ ۋاقىتىن اياماي جٷرگەن ۇستازداردىڭ ساپالى بٸلٸم بەرۋٸنە كەدەرگٸ كەلتٸرەتٸن پايداسىز ٸس-شارالار تٸزبەگٸ ازايماي تۇر.
“مەكتەپتەگٸ جيىندار, اپتالىق پەن سەمينارلار, قاجەت ەمەس جارىستار, كەرەگٸ جوق قۇجاتتار مۇعالٸمنٸڭ التىن ۋاقىتىن ۇرلاۋدا. سول قاعازداردى جازامىز, تولتىرامىز دەپ جٷرگەندە ساباققا دايىندالۋعا مۇرشامىز بولماي قالاتىنى جاسىرىن ەمەس. فيزيكالىق تۇرعىدان ٷلگەرمەيتٸندەي كٷندەر دە بولادى”, - دەيدٸ ول.
اقتٶبەلٸك ۇستاز بٸلٸم سالاسىنا بٸرشاما ٶزگەرٸس كەرەك دەگەن ۇستانىمدا.
“مۇعالٸمنٸڭ تەمٸر ەمەس, ەڭ الدىمەن ادام ەكەنٸن ەسكەرٸپ, موينىنداعى كٶپ مٸندەتتەن ارىلتۋ كەرەك دەپ ويلايمىن. پەن مۇعالٸمٸنٸڭ باستى مٸندەتٸ - قاعازبەن ارپالىسۋ ەمەس, ساپالى ساباق بەرۋ. ال ساپالى ساباق - بٸلٸم كەپٸلٸ ەمەس پە? سول ٷشٸن مۇعالٸمدەردٸڭ ەشتەڭەگە الاڭداماي, ساپالى ساباق بەرۋٸنە مٷمكٸندٸك جاسالۋى كەرەك.
تاڭنان مەكتەپكە باس سۇققاننان, سٶزدٸڭ شىنى كەرەك, قاس قارايعاندا بٸر-اق شىعامىز. ٷيگە كەلٸپ شالا-شارپى شەي-تاماعىمىزدى ٸشٸپ تاعى دا سول قاعازعا وتىرامىز. تٷننٸڭ بٸر ۋاقىتىندا ۇيقىعا كەتٸپ, تاڭەرتەڭ تاعى دا سول تٸرشٸلٸك باستالادى. بۇدان كەلٸپ دەنساۋلىعىمىز اقساپ جاتادى”, - دەيدٸ مامان.
ونىڭ پٸكٸرٸنشە قازاقستاندا مۇعالٸمگە قارسى زاڭنىڭ بەرٸ كٷشتٸ, الايدا مۇعالٸمدٸ قورعايتىن زاڭ جوق. قوعامدا ۇستازداردىڭ جالاقىسىن كٶرە المايتىندار, كٶپسٸنەتٸندەر دە بار. بۇل قوعامنىڭ "جاس كەلٸنٸ" مۇعالٸمدەر...
سٶي دەگەن ۇلداناي ماراتقىزى: "كەيدە قۇجاتتارىمدى جيناپ كەتٸپ قالعىم كەلەدٸ. "بٸز كەزٸندە تەزەك تەردٸك, سەندەر دە تەزەك تەرٸڭدەر" دەگەن ۇراننان, ٷيٸندە تەربيە كٶرمەي, مەكتەپكە كەلٸپ كەنتسەرت قوياتىن وقۋشىدان, بالاسىنا جانى اشىمايتىن, الايدا سول "مەيٸرٸمدٸ" مەكتەپتەن كٷتەتٸن اتا-انادان, شاماسى كەلسە قاۋىپ, ودان ارتىلسا "جەۋگە" دايىن تۇراتىن ەرٸپتەستەردەن, جالپى ەدٸلەتسٸزدٸكتەن شارشادىم. قيت ەتسە, مۇعالٸمنەن كٶرەتٸن, مۇعالٸمنٸڭ موينىنا "وتىرىپ" العان قوعامنان شارشادىم. جۇرت الدىندا ەبدەن سىيى كەتكەن, سايقىمازاق ماماندىق بولسا, ول - بٸز. بۇل قوعامنىڭ "جاس كەلٸنٸ" مۇعالٸمدەر. مەكتەپتٸڭ وتىمەن كٸرٸپ, كٷلٸمەن شىعاسىڭ بٸراق بٸزگە جاقسى ات جوق...", - دەيدٸ مۇعالٸم.
