بۇگىن “ءادىل ءسوز” قورىنىڭ وتىنىشىمەن ءجانيا ۇرانقايەۆاعا ۇكىمەت عيماراتىنا كىرۋگە رۇقسات بەرىلدى. ەندى جۋرناليست ءوز قىزمەتىن تولىق ورىنداي الادى، دەپ حابارلايدى Dalanews.kz.
ۇكىمەتتىڭ باسپا ءسوز قىزمەتى 2024 جىلدىڭ سوڭىنا دەيىن ءجانيا ۇرانقايەۆانىڭ عيماراتقا كىرۋىنە قاتىستى شەكتەۋلەردى قايتا قارادى. بۇدان بىلاي ول جۋرناليستىك قىزمەتىن ەركىن تۇردە اتقارا الادى. دەگەنمەن عيماراتقا كىرۋ ەرەجەسى مەن بۇقارالىق اقپارات قۇرالدارىنا قاتىستى تالاپتاردى ەسكەرۋى قاجەت. جاڭا “ماسس-مەديا تۋرالى” زاڭنىڭ تالابىنا ساي، مەملەكەتتىك نىساندارعا كىرۋ كەزىندە قاۋىپسىزدىك شارالارى مەن ەرەجەلەردى ساقتاۋعا مىندەتتەلدى.
“ءادىل ءسوز” قورى بۇل جاعدايدى جۋرناليستەر مەن مەملەكەتتىك ورگاندار اراسىنداعى بايلانىستىڭ ناتيجەلى مىسالى رەتىندە اتاپ ءوتتى. سونىمەن قاتار جۋرناليستەردىڭ ەركىن جۇمىس ىستەۋى ءۇشىن اشىق كەلىسسوزدىڭ ماڭىزى زور ەكەنىن كورسەتتى. بۇل ءوز كەزەگىندە، مەملەكەتتىك ورگاندار مەن ب ا ق اراسىنداعى ارىپتەستىك اشىق قارىم-قاتىناستى قامتاماسىز ەتىپ، قوعامنىڭ سەنىمىن ارتتىرۋعا ىقپال ەتەدى.
اتالمىش كەلىسىم ءجانيا ۇرانقايەۆانىڭ جۋرناليستىك قىزمەتىن تولىققاندى اتقارۋعا مۇمكىندىك بەرىپ، مەديا وكىلدەرىنىڭ قۇقىعىن قورعاۋداعى ماڭىزدى قادام دەپ باعالانۋدا.
