قوستاناي وبلىسىنىڭ پوليسياسى ەسىرتكىنى زاڭسىز جارنامالاۋعا قارسى كۇرەستى باستادى، – دەپ حابارلايدى Polisia.kz.
قوستاناي وبلىسىنىڭ پوليسەيلەرى گراففيتي جازۋلاردى بوياۋ چەللەندجىن الماتى قالاسىنان جانە تۇركىستان وبلىسىنان قابىلدادى. قوستانايدا پوليسيا ەسىرتكىنىڭ زاڭسىز جارناماسىنا قارسى اۋقىمدى كۇرەستى جالعاستىرىپ جاتىر جانە بۇل باستامانى وڭىردەگى بۇل پروبلەماعا بەي-جاي قارامايتىن ازاماتتار دا قولدادى.
وبلىس ورتالىعىندا ەسىرتكىنى جارنامالايتىن گراففيتيدى جويۋ بويىنشا اۋقىمدى اكسيا ءوتتى. ماڭىزدى ءىس-شارانى پوليسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى ۇيىمداستىردى.
وعان 400-گە جۋىق ەرىكتى، سونىڭ ىشىندە كوللەدجدەر مەن ۋنيۆەرسيتەت ستۋدەنتتەرى، مۇددەلى مەملەكەتتىك ورگانداردىڭ وكىلدەرى، سونداي-اق جەرگىلىكتى قالا تۇرعىندارى قولداۋ كورسەتتى.
ءىس-شارانى وتكىزۋدە پوليسەيلەرگە “قوستانايدىڭ جاس كوشباسشىلارى” ۇەۇ جاردەمدەستى. ولار ەرىكتىلەرگە “ەسىرتكىگە جول جوق” دەگەن جازۋى بار فۋتبولكالار مەن باس كيىمدەر، سونداي-اق اەروزولدىك بۇرىككىشتەر، قولعاپتار بەردى. وسىنداي جۇمىلا جاسالعان ءىس قازىرگى زاماننىڭ ەڭ ماڭىزدى ماسەلەلەرىنىڭ بىرىمەن كۇرەسۋ جولىندا قالاي بىرىگە الاتىنىن كورسەتتى. بىرنەشە ساعات ىشىندە قاتىسۋشىلار وبلىس ورتالىعىنىڭ ءار تۇكپىرىندە 700-دەن استام گراففيتيدى جويدى.
پوليسيا بۇل جەرلەردى الدىن-الا انىقتاعان بولاتىن. جۇمىس قالا ورتالىعىندا دا، شەتكى اۋماقتاردا دا جۇرگىزىلدى. بۇل باستاما ەسىرتكى قىلمىستارىنىڭ جولىن كەسۋگە عانا ەمەس، قالانىڭ سىرتقى كەلبەتىن جاقسارتۋعا دا باعىتتالعان.
ايتا كەتەيىك، قازىرگى ۋاقىتتا پوليسەيلەر ەسىرتكى زاتتارىن زاڭسىز ناسيحاتتاۋ فاكتىلەرى بويىنشا 40-قا جۋىق قىلمىستىق ءىس قوزعاعان. اكسيانى ۇيىمداستىرۋشىلار مۇنداي ءىس-شارالار جۇرتشىلىقتىڭ نازارىن ناشاقورلىق پروبلەماسىنا اۋدارۋعا كومەكتەسەدى جانە ەسىرتكىگە قوعامدا ورىن جوق ەكەندىگىن كورسەتەدى دەپ ۇمىتتەنەدى. ۆەدومستۆو جۇمىس ىستەپ تۇرعان ساll-ورتالىق (8-747-050-35-78) تۋرالى ەسكە سالادى، ول بويىنشا تابىلعان زاڭسىز جازۋلاردىڭ گەولوكاسياسى تۋرالى حابارلاۋعا بولادى.
ۇمىتكۇل نۇر
