اتىراۋ وبلىسىنداعى 8 جول ۋچاسكەسىن سالۋعا جانە جوندەۋگە ۇكىمەت رەزەرۆىنەن 5،9 ملرد تەڭگە ءبولىندى، دەپ حابارلايدى Dalanews.kz.
ءتيىستى قاۋلىعا پرەمەر-پينيستر ولجاس بەكتەنوۆ قول قويعان. ۇكىمەتتىڭ مالىمەتىنە سۇيەنسەك، اقشا ۇكىمەتتىڭ توتەنشە رەزەرۆىنەن كولىك مينيسترلىگىنە قاراي بولىنەدى.
"اتىراۋ وبلىسىنىڭ بيۋدجەتىنە اۋدارۋ ءۇشىن ۇكىمەتتىڭ توتەنشە رەزەرۆىنەن ق ر كولىك مينيسترلىگىنە شامامەن 5،9 ملرد تەڭگە ءبولۋ قاراستىرىلعان. اتالعان قاراجاتتىڭ 4،6 ملرد تەڭگەسى وبلىستىق ماڭىزى بار اۆتوجولداردىڭ جەتى ۋچاسكەسىن، ونىڭ ىشىندە، "يندەر – قاراباۋ – ساعىز"، قاراباۋ كەنتىنە كىرمە جولدار، "سارىتوعاي – ماحامبەت"، "اتىراۋ – يندەر"، سونداي-اق قۇلسارى قالاسىنداعى جاياۋ جۇرگىنشىلەر جولىن قالپىنا كەلتىرۋگە باعىتتالادى.
سۋ تاسقىنى سالدارىنان زارداپ شەككەن "يندەر – قاراباۋ – ميالى – ساعىز" اۆتوجولىنداعى كوپىر مەن سۋ وتكىزۋ قۇبىرلاردىڭ قۇرىلىسىنا شامامەن 1،3 ملرد تەڭگە بولىنەدى"، - دەپ حابارلادى ۇكىمەتتىڭ باسپا ءسوز قىزمەتى.
دەرەككوزگە سۇيەنسەك، سۋ تاسقىنى كەزىندە وسى وبلىستاعى 11 جول ۋچاسكەسى قيراعان، بەس جولدا سۋ وتكىزەتىن قۇبىرلار زاقىمدانعان.
