ق ر پرەمەر-ءمينيسترى ولجاس بەكتەنوۆ 2025 جىلعى 23 ساۋىردە ۇكىمەت وتىرىسىندا ەنەرگەتيكا مينيسترىنە جاڭاوزەندە گاز وڭدەۋ زاۋىتىنىڭ (گءوز) قۇرىلىس قارقىنىنا قاتىستى ەسكەرتۋ جاساپ، تاپسىرما بەردى، دەپ حابارلايدى Dalanews.kz.
ولجاس بەكتەنوۆ قۇرىلىس جۇمىستارىنىڭ باياۋ ءجۇرىپ جاتقانىن اتاپ ءوتتى. بۇعان پرەزيدەنت دە باسا نازار اۋدارعان بولاتىن. ول گاز سالاسىنداعى زاڭنامانى سيفرلاندىرۋ جانە جەتىلدىرۋ جونىندەگى نەگىزگى باستامالار تۋرالى بايانداما جاساعان ەنەرگەتيكا ءمينيسترى ەرلان اقكەنجەنوۆتەن وسى ماسەلە بويىنشا ەسەپ بەرۋدى سۇرادى.
"جاڭاوزەن قالاسىندا جاڭا گاز وڭدەۋ زاۋىتىن سالۋ جوباسىن ىسكە اسىرۋ بارىسى ءبىزدىڭ باقىلاۋىمىزدا. بۇگىنگى تاڭدا ءبىرىنشى ىسكە قوسۋ كەشەنى بويىنشا قۇرىلىس-مونتاج جۇمىستارى جۇرگىزىلۋدە. 24 ساۋىردە جوبالىق جۇمىستار اياقتالادى. سودان كەيىن جۇمىس جوباسى ءشىلدەدە قورىتىندى شىعارۋ ءۇشىن مەملەكەتتىك ساراپتاماعا تاپسىرىلادى"، - دەپ جاۋاپ بەردى مينيستر.
سونداي-اق ول قازاقستانعا كەلەسى جىلعا دەيىن جەتكىزىلەتىن جانە مونتاجدالاتىن جابدىققا تاپسىرىس ورنالاستىرىپ قويعاندارىن دا جەتكىزدى. بەكتەنوۆ مينيسترگە بۇل ماسەلەنى جەكە باقىلاۋعا الۋدى تاپسىردى.
