بۇكىل ەل بويىنشا «تازا قازاقستان» رەسپۋبليكالىق اكسياسى اياسىندا جاپپاي اعاش وتىرعىزۋ بويىنشا ەكولوگيالىق ناۋقان باستالدى. پرەزيدەنت قاسىم-جومارت توقايەۆ استانا قالاسىنداعى «جاستار» ساياباعىندا ەكوبەلسەندىلەرمەن بىرگە اعاش ەكتى، - دەپ حابارلايدى Dalanews.kz
باتىس قازاقستان وبلىسى دا اتالعان اكسياعا قوسىلدى. جوسپار بويىنشا، وڭىردە بيىل 228 مىڭ اعاش وتىرعىزۋ كوزدەلۋدە، ونىڭ ىشىندە شامامەن 5 مىڭعا جۋىعى وبلىس ورتالىعى — ورال قالاسىندا ەگىلمەك.
بۇگىن ەكولوگيالىق اكسيا اياسىندا تۇڭعىش پرەزيدەنت الاڭىندا 55 اعاش وتىرعىزىلدى.
ءىس-شاراعا قاتىسقان بقو اكىمى ناريمان تورەعالييەۆ ەكولوگيالىق اكسيانىڭ تەك كوگالداندىرۋ مەن اۋماقتى اباتتاندىرۋ عانا ەمەس، تابيعاتقا جاۋاپكەرشىلىكپەن قاراۋ مادەنيەتىن قالىپتاستىرۋعا قوساتىن ۇلەسىن اتاپ ءوتتى.
«بۇل تەك اباتتاندىرۋ شاراسى ەمەس، سونىمەن قاتار حالىقتىڭ ەكولوگيالىق مادەنيەتىن ارتتىرۋعا، تۋعان جەرگە جاناشىرلىق تانىتۋعا باعىتتالعان ماڭىزدى قادام. ءبىز بۇل ءىستى بىرىگىپ، جۇيەلى تۇردە وبلىستىڭ بارلىق اۋدان-قالالارىندا اباتتاندىرۋ مەن تازالىق جۇمىستارىن جۇرگىزۋىمىز قاجەت. ءاربىر مەكەمە، ۇيىم جانە ەلدى مەكەندەر بۇل اكسياعا بەلسەندى قاتىساتىنىنا سەنىمدىمىن»، — دەدى وبلىس اكىمى.
ەسكە سالايىق، «تازا قازاقستان» ەكولوگيالىق اكسياسى 2023 جىلدان باستاپ مەملەكەت باسشىسىنىڭ باستاماسىمەن وتكىزىلىپ كەلەدى جانە اكسيا ەلىمىزدىڭ جاسىل قورىن قالپىنا كەلتىرۋ مەن كوبەيتۋگە، ەكولوگيالىق جاعدايدى جاقسارتۋعا، قوقىستان تازارتۋعا جانە قوعامنىڭ قورشاعان ورتاعا دەگەن جاۋاپكەرشىلىگىن ارتتىرۋعا باعىتتالعان.
