Búkil el boıynsha «Taza Qazaqstan» respýblıkalyq aksıasy aıasynda jappaı aǵash otyrǵyzý boıynsha ekologıalyq naýqan bastaldy. Prezıdent Qasym-Jomart Toqaev Astana qalasyndaǵy «Jastar» saıabaǵynda ekobelsendilermen birge aǵash ekti, - dep habarlaıdy Dalanews.kz

Batys Qazaqstan oblysy da atalǵan aksıaǵa qosyldy. Jospar boıynsha, óńirde bıyl 228 myń aǵash otyrǵyzý kózdelýde, onyń ishinde shamamen 5 myńǵa jýyǵy oblys ortalyǵy — Oral qalasynda egilmek.

Búgin ekologıalyq aksıa aıasynda Tuńǵysh Prezıdent alańynda 55 aǵash otyrǵyzyldy.

İs-sharaǵa qatysqan BQO ákimi Narıman Tóreǵalıev ekologıalyq aksıanyń tek kógaldandyrý men aýmaqty abattandyrý ǵana emes, tabıǵatqa jaýapkershilikpen qaraý mádenıetin qalyptastyrýǵa qosatyn úlesin atap ótti.

«Bul tek abattandyrý sharasy emes, sonymen qatar halyqtyń ekologıalyq mádenıetin arttyrýǵa, týǵan jerge janashyrlyq tanytýǵa baǵyttalǵan mańyzdy qadam. Biz bul isti birigip, júıeli túrde oblystyń barlyq aýdan-qalalarynda abattandyrý men tazalyq jumystaryn júrgizýimiz qajet. Árbir mekeme, uıym jáne eldi mekender bul aksıaǵa belsendi qatysatynyna senimdimin», — dedi oblys ákimi.

Eske salaıyq, «Taza Qazaqstan» ekologıalyq aksıasy 2023 jyldan bastap Memleket basshysynyń bastamasymen ótkizilip keledi jáne aksıa elimizdiń jasyl qoryn qalpyna keltirý men kóbeıtýge, ekologıalyq jaǵdaıdy jaqsartýǵa, qoqystan tazartýǵa jáne qoǵamnyń qorshaǵan ortaǵa degen jaýapkershiligin arttyrýǵa baǵyttalǵan.