الەۋمەتتىك جەلىدە اقتاۋداعى ۇشاق اپاتىنان امان قالعان 48 جاستاعى سۋبحونك راحيموۆتىڭ ۆيدەوسى تارادى. ول اپات بولعان ورىندى تاسپاعا تارتقان كەزدە، قۇتقارۋشىلاردىڭ ءوزارا اڭگىمەسى دە كامەراعا جازىلىپ قالعان. ءسوز بارىسىندا زاڭ بۇزۋشىلىقتىڭ الدىن الۋعا قاتىستى ماڭىزدى ەسكەرتۋلەر جاسالعانى بايقالادى، دەپ حابارلايدى Dalanews.kz.

ۆيدەودان ءبىر توپ قۇتقارۋشىنىڭ وقيعا ورنىنا كومەككە كەلگەنىن اڭعارۋعا بولادى. ولار ابىر-سابىر كۇيدە اينالاسىن مۇقيات باقىلاپ ءجۇر. سول ساتتە ارالارىندا الدەكىمنىڭ داۋىسى جارقىن شىعادى. ول ارىپتەستەرىنە ماڭىزدى ەسكەرتۋ جاسايدى.

“بۇل جەردى ۆيدەوعا جانە سۋرەتكە تۇسىرمەڭدەر! قاجەتى جوق”، — دەيدى ۆيدەودا بەلگىسىز داۋىس يەسى.

بۇدان اڭعاراتىنىمىز، ەگەر قانداي دا ءبىر وقيعانىڭ كۋاسى بولىپ جاتساڭىز، ونى بىردەن تاسپاعا تارتۋعا اسىقپاڭىز. سەبەبى بۇل زاڭ بۇزۋشىلىق بولىپ سانالۋى مۇمكىن.

ايتا كەتەيىك، بۇعان دەيىن اقتاۋدا ۇشاق اپاتى بولعان جەردى سۋرەتكە تۇسىرگەن بلوگەر ازامات سارسەنبايەۆ قاماۋعا الىنعانى تۋرالى جازعان ەدىك.

بۇل تۋرالى بلوگەردىڭ ادۆوكاتى ايبەك سۇيىندىكوۆ حابارلادى. 

"ماڭعىستاۋ وبلىسى ءتۇپقاراعان اۋداندىق سوتىنىڭ ۇكىمىمەن ازامات سارسەنبايەۆ اكىمشىلىك قۇقىق بۇزۋشىلىق جاساعانى، ياعني قۇقىق قورعاۋ ورگانىنىڭ قىزمەتتىك مىندەتتەرىن ورىنداۋىنا بايلانىستى ونىڭ زاڭدى تالابىنا باعىنباعانى ءۇشىن كىنالى دەپ تانىلدى. سوت تاراپىنان 10 تاۋلىككە اكىمشىلىك قاماۋعا الۋ تۇرىندەگى جازا تاعايىندالدى. ءىستىڭ ءمان-جايىن ەسكەرە وتىرىپ، سوت ق ر اقبتك-نىڭ 667-بابىنىڭ 1-بولىگىنىڭ سانكسياسى شەگىندە، وندا اكىمشىلىك قاماۋدىڭ ەڭ ۇزاق مەرزىمى 15 تاۋلىك دەپ بەلگىلەنگەن، جازا قولداندى"، — دەيدى ادۆوكات. 

سوتتىڭ قاۋلىسى زاڭدى كۇشىنە ەنگەن جوق.

ەسكە سالايىق، 25 جەلتوقساندا اقتاۋدا ۇشاق اپاتقا ۇشىراعان جەردى تۇسىرگەن بلوگەر ۇستالعانى بەلگىلى بولدى. 

بلوگەر بۇل تۋرالى Instagram پاراقشاسىندا جازدى.

"مەنى ۇستادى. اقتاۋ قالالىق پوليسيا باسقارماسىنا بارا جاتىرمىن. ۇشاق اپاتقا ۇشىراعان جەردى تۇسىرگەنىم ءۇشىن ۇستاعان بولۋى مۇمكىن"، - دەدى ول.

ماڭعىستاۋ وبلىسىنىڭ پد مالىمەتىنشە، سارسەنبايەۆ قوعامدىق ءتارتىپتى بۇزعانى ءۇشىن ۇستالعان.

"ول وقيعا ورنىندا درون ۇشىرىپ، قۇتقارۋ جانە تەرگەۋ جۇمىستارىنا كەدەرگى كەلتىردى جانە پوليسيا قىزمەتكەرلەرىنىڭ زاڭدى تالاپتارىنا باعىنبادى. ءقازىر قۇقىقبۇزۋشى پوليسيا باسقارماسىنا جەتكىزىلدى، وعان قاتىستى قولدانىستاعى زاڭناماعا سايكەس شارالار قابىلدانادى"، - دەدى پوليسيا.

ايتا كەتەيىك، بۇعان دەيىن بلوگەر درون كومەگىمەن اقتاۋداعى جولاۋشىلار ۇشاعى اپاتقا ۇشىراعان جەردى سۋرەتكە ءتۇسىرىپ، جاريالاعان بولاتىن.