بۇگىن جەتىسۋ وبلىسىنىڭ ۆولونتەرلارى 25 جەلتوقساندا اقتاۋ قالاسىنا تاياۋ ماڭدا قۇلاعان «باكۋ-گروزنىي» باعىتىنداعى جولاۋشىلار ۇشاعى اپاتىنان زارداپ شەككەندەرگە كومەك كورسەتۋ ماقساتىندا تالدىقورعانداعى قان ورتالىعىنا بارىپ، قان تاپسىردى، - دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەپ.
وبلىستاعى ەرىكتى جاستار العاشقىلاردىڭ ءبىرى بولىپ قان تاپسىرۋعا نيەت بىلدىرگەن. ولار قيىن جاعدايعا تۇسكەن جاندارعا قان بەرۋ ارقىلى كومەك كورسەتۋگە جورا-جولداستارى مەن تانىستارىن دا شاقىرۋدا.
- اقتاۋ قالاسىندا اۋە كەمەسىنىڭ قۇلاعانى تۋرالى وقىس جاڭالىق بارىمىزگە اۋىر ءتيدى. اپاتتان قانشاما ادام كوز جۇمدى، مارقۇمداردىڭ جانى جانناتتا بولسىن دەيمىز. ءتىرى قالعانداردىڭ تەز ساۋىعىپ، امان-ەسەن جاقىندارىنا ورلاۋىنا كومەگىمىز ءتيسىن دەپ، بۇگىن قان تاپسىرۋعا كەلدىك. ەندى مۇنداي اۋىر جاعداي قايتالانباسىن دەپ تىلەيمىز، - دەدى «اسسامبلەيا جاستارى» ەرىكتىلەر توبىنىڭ مۇشەسى زايدا قۇرماشيەۆا.
وبلىستىق قان ورتالىعىنىڭ مالىمەتىنە قاراعاندا، بۇگىن ساعات 12.00-گە دەيىن 49 ادام قان تاپسىرعان.
– ورتالىققا اۋە اپاتىنان جاراقات العان مۇقتاج جاندار ءۇشىن قان كومەك تاپسىرامىز دەپ ەرىكتى جاستار كەلىپ جاتىر. ازىرگە اقتاۋداعى قان تاپسىرۋ ورتالىعىندا قان جەتكىلىكتى. ەگەر جەدەل قان كەرەك دەسە ءبىز كەز كەلگەن ۋاقىتتا جىبەرۋگە دايىنبىز، – دەدى وبلىستىق قان ورتالىعىنىڭ ديرەكتورى مارات دوسقالييەۆ.
اكىمدىك جەتىسۋ وبلىسى تۇرعىندارىنىڭ اتىنان ۇشاق اپاتىندا قايتىس بولعانداردىڭ وتباسىلارى مەن جاقىندارىنا كوڭىل ايتتى.
