قازاقستان قور بيرجاسى ءوزىنىڭ رەسمي تىزىمىنە قارا تەڭىز ساۋدا جانە دامۋ بانكىنىڭ (BSTDB) باعالى قاعازدارىن تىركەدى. اكسيونەرلەرى قۇرامىنا 11 مەملەكەت كىرەتىن مۇنداي حالىقارالىق قارجىلىق ۇيىمنىڭ قازاقستان ەميتەنتى اتانۋى نەنى بىلدىرەدى؟ بۇل تۋرالى Dalanews.kz سايتىنان وقىپ-بىلە وتىرىڭىزدار.
قارا تەڭىز ساۋدا جانە دامۋ بانكى 1997 جىلى 24 قاڭتاردا قۇرىلعان، ۇلتتىقتان جوعارى مارتەبەگە يە حالىقارالىق قارجى ينستيتۋتى. باستى كەڭسەسى گرەسيادا ورنالاسقان. جارعىلىق كاپيتالى - 3،45 ملرد ەۆرو. ءىرى اكسيونەرلەرى - رەسەي، گرەسيا جانە تۇركيا، ۇشەۋىنىڭ ءارقايسىسى تەڭ ۇلەسكە - 16،58%-دان يە.
قالعان اكسيونەرلەرى:
- رۋمىنيا - 14،0%،
- بولگاريا – 13،5%،
- ۋكراينا – 13،5%،
- ءازىربايجان – 5،0%،
- البانيا – 2،0%،
- ارمەنيا – 1،0%،
- گرۋزيا - 0،5%،
- مولدوۆا– 0،5% .
بانكتىڭ باستى مىندەتى – ساۋدا-ساتتىقتى، ءتۇرلى جوبالاردى قارجىلاندىرۋ جانە كەپىلدىك ۇسىنۋ، جەكەمەنشىك جانە مەملەكەتتىك كاسىپورىنداردىڭ اكسيونەرلىك كاپيتالىنا قاتىسۋ ارقىلى مۇشە-مەملەكەتتەردىڭ ەكونوميكالىق دامۋىن قولداۋ.
قارا تەڭىز ساۋدا جانە دامۋ بانكى (BSTDB) قازاقستاندا العاش رەت توبە كورسەتىپ وتىرعان جوق. ول بۇعان دەيىن 2022 جىلى 1 شىلدەدە "استانا" حالىقارالىق قارجى ورتالىعىنا (AIX) دا بوندتارىن ورنالاستىرعان بولاتىن. سول كەزدە اتالعان بانكتىڭ ءبىزدىڭ ەلىمىزدەگى اندەررايتەرى بولىپ "Teniz Capital Investment Banking" اق بولىپ تانىلعان. 100 ملن دوللارعا باعالى قاعازدار شىعارىلىپ، ولاردىڭ ءبىر بولىگى بىزدە ورنالاستىرىلعان.
سول كەزدىڭ وزىندە بۇل سەرىكتەستىڭ قازاقستان ءۇشىن ستراتەگيالىق ماڭىزى جوعارى ەكەنى ايتىلعان.
"وڭىردەگى گەوساياسي تۇراقسىزدىق سانكسيالار تۇرىندە سولتۇستىك دالىزگە قاۋىپ-قاتەر ءتوندىرىپ وتىرعانى بەلگىلى. تاسىمال قىزمەتىندە لوگيستيكالىق شىعىندار ارتىپ، تۇرىپ قالۋ مۇمكىندىگى ارتۋدا. ارينە، ترانسكاسپيي حالىقارالىق مارشرۋتى جانە سولتۇستىك ءدالىزدىڭ كۇيى سىني جاعدايدا. مۇندايدا تۇركيانىڭ تەمىر جولدارىنا قاراعاندا قارا تەڭىز ارقىلى تاسىمال جاساۋ تيىمدىرەك كورىنەرى ءسوزسىز"، - دەيدى جەرگىلىكتى قىزمەت كورسەتۋشىلەر.
بۇل جاعداي Moody's، ەسەبىندە دە ەسكەرىلگەن، قازاقستاننىڭ ۇزاقمەرزىمدى نەسيەلىك رەيتينگى Baa2-دەن Baa1-گە دەيىن كوتەرىلگەن. دەمەك، قازاقستان مەن BSTDB مۇددەسى وسى وڭىردەگى بىرىككەن جوبالاردى دامىتۋ تۇرعىسىندا تۇيىسەدى.
"قازاقستاننىڭ بۇل قارجى ينستيتۋتىنا قاتىسۋى زاڭدى. مىسالى، قارا تەڭىزگە تىكەلەي شىعا المايتىن وسى بانككە مۇشە البانيا، ارمەنيا نەمەسە ءازىربايدجان سىندى ەلدەر بار. قازاقستان ءۇشىن مۇنداي جاعدايدا قوسىمشا قارجىلاندىرۋ كوزىنە جول اشىلادى. بانككە مۇشە بولعان جاعدايدا قازاقستان ءوز تەرريتورياسىنان تىس جەردە سولتۇستىك ءدالىزدى دامىتۋعا قاتىسا الادى. سايكەسىنشە، بانك كولىك-لوگيستيكاسى بويىنشا ىشكى جانە سىرتقى جوبالاردى قارجىلاندىرۋدا ماڭىزدى سەرىكتەس بولا الادى"،- دەيدى ساراپشىلار.
ايتا كەتسەك، بىرنەشە كۇن بۇرىن قازاقستان مەن رەسەي مۇنايىن "درۋجبا" قۇبىرى ارقىلى بەلارۋس پەن ەۋروپاعا ايداۋ ۋاقىتشا توقتاتىلدى. بۇعان تەحنيكالىق جوندەۋ جۇمىستارى سەبەپ ەكەنى ايتىلادى.
قازاقستان گەرمانياعا 2023 جىلدان باستاپ مۇناي يمپورتىن ۇلعايتا باستادى. شيكىزات "وزەن – اتىراۋ – سامارا" جانە "درۋجبا" مۇناي قۇبىرلارى ارقىلى ايدالادى. "درۋجبا" قۇبىرى وتاندىق شيكىزاتتى رەسەي تەرريتورياسى ارقىلى ("ترانسنەفت" جاق)، ودان ءارى گفر-عا تاسىمالداۋ ءۇشىن "اداموۆا زاستاۆا" مۇناي تاپسىرۋ پۋنكتىنە جەتكىزەدى.
سونداي-اق جەلتوقساننىڭ 10-نان 11-ىنە قاراعان ءتۇنى ۋكراينا اۋە كۇشتەرىنىڭ دروندارى رەسەيدىڭ بريانسك وبلىسىنداعى جانار-جاعارماي شىعاراتىن زاۋىتقا شابۋىل جاساعان. سالدارىنان بريانسك ماڭىنداعى سۆەن اۋىلىنداعى "درۋجبا" قۇبىرىنىڭ قۇيۋ بەكەتى وتقا ورانعانى تۋرالى اقپارات الەۋمەتتىك جەلىدە پايدا بولدى. الايدا بۇل مالىمەت رەسمي تۇردە جوققا شىعارىلدى.
