1 شىلدە كۇنى الماتى قالاسى جاستار ساياساتى باسقارماسىنىڭ قولداۋىمەن، سىبايلاس جەمقورلىققا قارسى ۆولونتەرلىك جوبا اياسىندا الاتاۋ اۋدانى، زەردەلى شاعىن اۋدانىندا جاستاردى ادالدىق پەن ادىلەتتىلىككە، زاڭعا باعىنۋ مەن قوعامدىق ءتارتىپتى ۇستانۋعا ۇندەيتىن كوركەم جوبا — «ادال ۇرپاق – جەمقورلىقسىز بولاشاق» اتتى مۋرالدىڭ سالتاناتتى اشىلۋ ءراسىمى ءوتتى،- دەپ حابارلايدى Dalanews.kz  

اشىلۋ سالتاناتىنا الماتى قالاسى جاستار ساياساتى باسقارماسى باسشىسىنىڭ ورىنباسارى كەنەسباي الماز اباي ۇلى، سىبايلاس جەمقورلىققا قارسى ۆولونتەرلىك جوبانىڭ جەتەكشىسى كەنەسوۆ اكەجان باقىت ۇلى، الاتاۋ اۋدانى اكىمدىگىنىڭ مادەنيەت جانە تىلدەردى دامىتۋ ءبولىمىنىڭ باسشىسى قالداربەكوۆ ەربول وسپان ۇلى، اسىل قازىنا قوعامدىق قورىنىڭ ءتوراعاسى مولداحان ورىنبەك تەمىربەك ۇلى، قوعام بەلسەندىلەرى مەن جاستار قاتىستى.

مۋرالدىڭ مازمۇنىندا ەڭبەك ادامى – دارىگەر، قۇرىلىسشى، پوليسيا قىزمەتكەرى بەينەلەنىپ، ادال ەڭبەكتىڭ قوعامداعى ماڭىزىن كورسەتۋ كوزدەلگەن. بۇل مەملەكەت باسشىسى جاريالاعان «جۇمىسشى ماماندىقتار جىلى» اياسىنداعى «زاڭ مەن ءتارتىپ» قاعيداتىنا سايكەس، تۇراقتى دامۋ نەگىزىن ناسيحاتتايدى.

بۇگىندە اتالمىش ۆولونتەرلىك جوبا اياسىندا 300-گە جۋىق جاس بەلسەندى قاتىسۋدا. ولار مەملەكەتتىك ساتىپ الۋ پروسەستەرى مەن قۇرىلىس نىساندارىندا اشىقتىقتى قامتاماسىز ەتۋ ماقساتىندا قوعامدىق باقىلاۋ جۇرگىزىپ، قۇقىقتىق جانە مادەني ساۋاتتىلىقتى ارتتىرۋ باعىتىنداعى ءىس-شارالارعا ۇيىتقى بولۋدا.

«ادال ۇرپاق – جەمقورلىقسىز بولاشاق» مۋرالى — بولاشاق ۇرپاققا ادىلەتتى قوعامنىڭ بەينەسىن ۇسىناتىن كوركەم ۇندەۋ عانا ەمەس، سونىمەن بىرگە جاستاردى قوعامدىق جاۋاپكەرشىلىككە باۋليتىن ماڭىزدى تاربيەلىك قۇرال.

ءىس-شاراعا قاتىسىپ، قولداۋ بىلدىرگەن بارشا ازاماتتارعا ۇيىمداستىرۋشىلار العىس ءبىلدىردى.

زاڭ مەن تارتىپكە نەگىزدەلگەن قوعام – جارقىن بولاشاق كەپىلى.