2025 جىلدىڭ ءى-توقسانىندا قازاقستاننىڭ ميكروقارجى ۇيىمدارى 30،4 ملرد تەڭگە تابىس تاپتى، بۇل - وتكەن جىلدىڭ سايكەس كەزەڭىمەن سالىستىرعاندا 6،8%-عا ارتىق كورسەتكىش. بۇعان ۇلتتىق بانك العا تارتقان دەرەكتەرى دالەل بولا الادى. ماسەلەن، تازا پايدا مولشەرى بويىنشا "زايمەر" برەندىمەن تانىمال "روبوكەش" مقۇ كوش باستاپ تۇر، دەپ حابارلايدى Dalanews.kz.

ول ءبىر جىل ىشىندە تابىسىن 74،8%-عا ۇلعايتىپ، 4،8 ملرد تەڭگە تاپقان. كومپانيا ونلاين-نەسيەلەۋگە جانە "جالاقىعا دەيىنگى شاعىن نەسيەلەر" بەرۋگە ماماندانعان.

"قازاقستاندا 2025 جىلعى قاڭتار-ناۋرىز ايلارىنداعى ەڭ تابىستى 10 مقۇ-نىڭ بەسەۋى دە ونلاين-نەسيەلەۋگە باعىت-باعدار العاندار. ايتا كەتۋ كەرەك، وتكەن جىلدىڭ تامىز ايىندا جالاقىعا دەيىنگى زاەمدار بويىنشا جىلدىق ءتيىمدى سىياقى مولشەرلەمەسىنىڭ (جتسم) ەڭ جوعارى شەگىن 179% دەڭگەيىندە شەكتەۋ ونلاين-نەسيەلەۋمەن اينالىساتىن كومپانيالاردىڭ تاباتىن پايداسىنا ايتارلىقتاي اسەر ەتكەن جوق. اسىرەسە، وسى شەكتى مولشەرلەمەلەر بەلگىلەنگەنگە دەيىن جالاقىعا دەيىنگى زاەمدار بويىنشا جتسم مولشەرلەمەسى 2600%-دان دا اسۋى مۇمكىن ەكەنىن ەسكەرسەك"، دەپ بۇل ستاتيستيكاعا Finprom تۇسىنىكتەمە كەلتىرەدى.

ەكىنشى ورىندا اۆتونەسيەلەۋ سالاسىنداعى "تويوتا فاينانشل سەرۆيسەز قازاقستان" مقۇ تۇر. ونىڭ تازا پايداسى 61،4% -عا، ياعني 3 ملرد تەڭگەگە دەيىن ءوستى. ۇزدىك وندىققا اۆتونەسيەلەۋ سالاسىنان "شينحان فينانس" (1،2 ملرد تەڭگە) مقۇ-دا ىلىنگەن.  

سونىمەن قاتار، ۇزدىك وندىق قاتارىندا جەكەلەي كليەنتتەرمەن دە، بيزنەسپەن دە جۇمىس ىستەيتىن "امبەباپ" مقۇ-لار دا بار: KMF (2،4 ملرد تەڭگە)، Tas Finance Group (1،5 ملرد تەڭگە) جانە "ارنۋر كرەديت" (917 ملن تەڭگە).

2025 جىلدىڭ 1 ساۋىرىندەگى جاعداي بويىنشا، قازاقستاندا 213 مقۇ تىركەلگەن، ونىڭ ىشىندە 143 كومپانيا ءى-توقساننىڭ قورىتىندىسى بويىنشا تازا پايداعا كەڭەلگەن.  10 مقۇ نولدىك قارجىلىق ناتيجە كورسەتتى. بىردەن 60 ۇيىم شىعىنعا ۇشىراعان.

بۇعان دەيىن زاڭسىز ءارى جوعارى پايىزبەن نەسيە بەرگەن "جىلدام اقشا" ميكروقارجى ۇيىمى تەكسەرىلىپ جاتقانىن جازعانبىز.