اباي قۇنانباي ۇلىنىڭ ءۇيىن كورسەتەمىن دەپ سىنعا قالعان جۋرناليست ءاليا ءاشىم قازاقستاندىقتاردان كەشىرىم سۇرادى، دەپ حابارلايدى Dalanews.kz.
جۋرناليست قارقارالىداعى ۆيدەو ابەس بولعانىن اتاپ ءوتتى.
"سىزدەر - اكەم، اعا-اپكەلەرىممەن قاتار قاۋىم ءۇشىن “ابايدى قورلاعان قىز” دەگەن “اتاقپەن” قالامىن دەپ ەش ويلاماپپىن. فەيسبۋكتە سيرەك وتىرامىن، ءبىراق كەشەلى-بەرى ءوزىم سىيلايتىن، بوي تۇزەيتىن كەي ازاماتتاردىڭ پوستىن وقىپ جۇرەگىم اۋىرىپ وتىرعانى... وسىندا تاراعان قارقارالىداعى ۆيدەونىڭ ابەس بولعانىن مويىندايمىن. ونى اۋىلداعى اكەم دە رەنجىپ، ەسكەرتتى. سوندىقتان تابالاۋ ەمەس، جاناشىرلىقپەن، ورىندى سىن ايتقان اعا-اپكەلەرىمنەن كەشىرىم سۇرايمىن"، - دەيدى جۋرناليست.
ءاليا ءاشىم ورىنسىز سىناعاندار دا بولعانىن ايتتى.
"ءبىر ايتقىم كەلەتىنى - "ابايدى قورلاۋ ماقساتىندا”، “قارالىم ءۇشىن”، “توپتار قارجىلاندىرادى” دەگەن كەي پىكىرلەرمەن كەلىسە المايمىن. شىن مانىندە، ءبىز - قازاقتىڭ مادەنيەتىن، تاريحىن بارىنشا ناسيحاتتاۋعا تىرىسىپ جۇرگەن كوماندامىز (ءوزىم سولاي دەپ ۇمىتتەنەمىن، ارىپتەستەر ايتسىن).
اقش-قا وقۋعا كەتپەس بۇرىن قازاقشا كونتەنت، تاريحي دەرەكتى فيلمدەر ءۇشىن ءبىراز بيزنەس وكىلدەرىنىڭ ەسىگىن قاعىپ، سەرىكتەستىك ۇسىناتىن ەدىك. قانشاما پرەزەنتاسيا، پيچيڭ وتتىك. قولداعاندار ءبىرلى-جارىم بولدى. كەيىن ەلگە ورالعان سوڭ، ۇكىمەتتەن، ەشبىر توپتان اقشا الماي، تازا قازاق كونتەنتىن كوممەرسياليزاسيالاۋعا بارىمىزدى سالدىق. قازىرگى تاڭدا Freedom Holding Corp.، Bi Group، Aviasales، Sandyq Group، Halyq Bank ىسپەتتى ءىرىلى-ۇساق ءبىراز كومپانيالاردىڭ جارنامالىق ماتەريالدارىن جاساپ، ودان تۇسكەن قارجىنى تۇتاس اعارتۋشىلىق جوبالارعا سالىپ ءجۇرمىز. (اعارتۋشىلىق جوبالارعا ەش ۇيىمنىڭ ىقپالى جوق). وسى كۇنگە دەيىن (تازا ءوز قارجىمىزعا) “قونايەۆ ءداۋىرى”، “ءبىز نەگە ورىسشا سويلەيمىز؟”، “جەلتوقسان” دەرەكتى فيلمدەرىن تۇسىردىك. كەيىن ءدال وسى تاقىرىپتاردى الەۋمەتتىك جەلىدە (TikTok، Instagram) بارىنشا جاستار قىزىعاتىنداي فورمادا بەرىپ كەلدىك"، - دەيدى ول.
ءجۋرناليستىڭ سوزىنشە، كەي توپتار قارجىلاندىرادى دەپ بولىسكەن ۆيدەوداعى "قۇيرىق-باۋىر" تۋرالى اقپارات “ءسالت-داستۇر سويلەيدى” كىتابىنان الىنعان.
"ۆيدەونىڭ استىندا سىلتەمە دە بولعان ەدى. ەشكىمنىڭ ءلوببيىنسىز، سول اقپارات نەگىزىندە جاسالدى. ال تالعات رىسقۇلبەكوۆپەن فوتو - ءبىزدىڭ بولاشاق جوبامىزعا قاتىستى سۇقبات بارىسىندا ءتۇسىرىلدى. “جەلتوقسان” دەرەكتى فيلمىنەن كەيىن سول كەزدە سوتتالعان بارلىق اعا-اپكەلەردەن سۇقبات جازىپ قالۋدى ماقسات تۇتتىق. ءوز قارجىمىزعا، قازاقستاننىڭ بارلىق اۋماعىن ارالاپ، وسى كۇنگە دەيىن “جەلتوقسان وقيعاسى” كەزىندە سوتتالعان 103 ادامنىڭ 40-نان سۇقبات جازدىق. ءالى دە وسىنداي شامادا سۇقبات جازىلادى. بۇل - تاريحي جادتى ساقتاۋ، اعا-اپكەلەردىڭ كوزى ءوتىپ كەتپەي تۇرعاندا اتقارۋىمىز قاجەت ميسسيا دەپ ىسكە كىرىسكەنبىز"، - دەيدى ءاليا.
ول ابايدى مازاق ەتۋ، قازاقتىڭ مادەنيەت، تاريحىن قورلاۋ دەيتىن نيەتىم ەشقاشان بولماعانىن ايتتى.
"كەرىسىنشە، تاريحي جادتى قالپىنا كەلتىرۋ، سانانىڭ دەكولونيزاسياسى، وتكەنگە جاڭا رەفلەكسيا جاساۋعا نيەتتەنىپ، جاستارعا جوبالار جاساپ كەلەمىز. ءالى جاسايمىز دا. YouTube-تە بارلىق جوبالارىمىزبەن تانىسا الاسىزدار. نيەتىمدى جەتكىزە الدىم دەپ سەنەمىن. قولداۋلارىڭىز، ورىندى سىندارىڭىز ءۇشىن راقمەت!"، - دەيدى جۋرناليست.
