ءال-فارابي اتىنداعى قازاق ۇلتتىق ۋنيۆەرسيتەتى اعىمداعى جىلى 562 ءبىلىم بەرۋ باعدارلاماسىن جۇزەگە اسىرۋدا. ونىڭ ىشىندە 149 باكالاۆريات، 285 ماگيستراتۋرا، 128 دوكتورانتۋرا باعدارلاماسى قامتىلعان،- دەپ حابارلايدى Dalanews.kz
كوپسالالى جەتەكشى ۋنيۆەرسيتەتتىڭ ءبىلىم بەرۋ باعدارلامالارى قازىرگى زامانعى جاھاندىق وزگەرىستەرگە، ەڭبەك نارىعىنداعى سۇرانىسقا جانە ۇلتتىق ەكونوميكانىڭ دامۋ باسىمدىقتارىنا ساي بەيىمدەلگەن. ۋنيۆەرسيتەت مامانداردى دايارلاۋدى ءارتۇرلى سالادا: ىرگەلى عىلىمنان باستاپ – قولدانبالى زەرتتەۋلەرگە، گۋمانيتارلىق باعىتتاردان – ينجەنەرلىك جانە تەحنولوگيالىق ماماندىقتارعا دەيىن كەڭ كولەمدە جۇزەگە اسىرادى.
اتاپ ايتقاندا اقپاراتتىق تەحنولوگيالار جانە جاساندى ينتەللەكت؛ ينجەنەريا، ەنەرگەتيكا، يادرولىق جانە ۋران ءوندىرىسى؛ بيومەديسينا جانە قولدانبالى بيوفيزيكا؛ ەكولوگيا، گەولوگيا جانە سەيسمولوگيا؛ حالىقارالىق قاتىناستار، قۇقىق، قوعامدىق ديپلوماتيا؛ جۋرناليستيكا، ءتىل ءبىلىمى جانە فيلولوگيا؛ قارجى، ەكونوميكا، بيزنەس-تالداۋ جانە مەنەدجمەنت سالالارىندا باسەكەگە قابىلەتتى كادرلاردى ەڭبەك نارىعىنا قوسۋدا.
سونداي-اق قازۇۋ سيفرلىق ءداۋىر تالاپتارىنا ساي بيىل بىرنەشە جاڭا يننوۆاسيالىق باعدارلامانى ىسكە قوستى. ولاردىڭ قاتارىندا: «جاساندى ينتەللەكت»، «باعدارلامالىق ينجەنەريا»، «اسكەري كريپتولوگيا»، «بيومەديسينالىق ينجەنەريا»، «قولدانبالى بيوفيزيكا»، «IT-مەنەدجمەنت»، «جەر سىلكىنىستەرىنىڭ گەولوگياسى» جانە باسقا دا باعىتتار بار.
ۋنيۆەرسيتەت 60 قوسديپلومدىق باعدارلاما ۇسىنادى. بۇل باعدارلامالار گەرمانيا، پورتۋگاليا، يتاليا، جۇڭگو، رەسەي، فرانسيا سىندى ەلدەردىڭ جەتەكشى جوعارى وقۋ ورىندارىمەن بىرلەسكەن. سەرىكتەستەر قاتارىندا ۆيسمار ۋنيۆەرسيتەتى (گەرمانيا)، ليسسابون ۋنيۆەرسيتەتى (پورتۋگاليا)، لا ساپيەنسا ۋنيۆەرسيتەتى (يتاليا)، سولتۇستىك-باتىس پوليتەحنيكالىق ۋنيۆەرسيتەتى (قحر)، م.ۆ.لومونوسوۆ اتىنداعى ممۋ (رەسەي) جانە تاعى باسقالار بار.
سونىمەن قاتار ۋنيۆەرسيتەت ءوز قىزمەتىن جاھاندىق دەڭگەيدە كەڭەيتىپ كەلەدى. قازىرگى ۋاقىتتا تۇركيا، قىرعىزستان، رەسەي ەلدەرىندە قازۇۋ فيليالدارى اشىلىپ، تابىستى جۇمىس ىستەۋدە. قازۇۋ بازاسىندا ميفي (رف) جانە سولتۇستىك-باتىس پوليتەحنيكالىق ۋنيۆەرسيتەتىنىڭ (قحر) فيليالدارى قىزمەت اتقارادى.
ۋنيۆەرسيتەت سيفرلىق ترانسفورماسيانى دا قارقىندى يگەرۋدە: Open KazNU ونلاين پلاتفورماسىندا 127 ونلاين كۋرس قولجەتىمدى، Coursera پلاتفورماسىمەن ينتەگراسيالاۋ جالعاسۋدا، ال ءبىلىم بەرۋ ۇدەرىسىنە گەنەراتيۆتى جاساندى ينتەللەكت (GenAI) تەحنولوگيالارى ەنگىزىلۋدە.
بۇگىنگى تاڭدا قازۇۋ-دا 27 500-دەن استام ستۋدەنت ءبىلىم الۋدا، ونىڭ ىشىندە 50-دەن استام ەلدەن كەلگەن 4000-نان استام شەتەلدىك ستۋدەنت بار. بۇل ۋنيۆەرسيتەتتىڭ حالىقارالىق ءبىلىم كەڭىستىگىندە جوعارى بەدەلگە يە ەكەنىنىڭ ايقىن كورسەتكىشى.
