قازاقستاندا رەسەيلٸك بيزنەستٸڭ ٷلەسٸ قارقىندى تٷردە ازايۋدا. بيىلعى جىلدىڭ ەكٸنشٸ توقسانىندا ەلٸمٸزدەگٸ رەسەيلٸك كومپانييالاردىڭ سانى سوڭعى التى جىلداعى ەڭ ٷلكەن قارقىنمەن قىسقارعان. ۇلتتىق ستاتيستيكا بيۋروسىنىڭ دەرەگٸنە سٷيەنسەك, بيىل 1 سەۋٸر مەن 1 شٸلدە ارالىعىندا رەسەي كاپيتالى بار كەسٸپورىنداردىڭ سانى 728-گە كەمٸپ, 17,6 مىڭعا دەيٸن تٶمەندەدٸ, دەپ حابارلايدى Dalanews.kz.
DATA HUB ساراپشىلارىنىڭ پٸكٸرٸنشە, مۇنداي جاعىمسىز ديناميكا بٸر جىلدان اسا ۋاقىتتان بەرٸ توقتاۋسىز جالعاسىپ كەلەدٸ. ەگەر 2022 جىلى گەوساياسي شيەلەنٸس سالدارىنان رەسەي بيزنەسٸ قازاقستانعا اعىلىپ كەلسە, قازٸر كەرٸسٸنشە, كٶرسەتكٸشتەر بۇرىنعى دەڭگەيٸنە قاراي كەرٸ شەگٸنۋدە. بىلتىرعى سەۋٸر ايىمەن سالىستىرعاندا رەسەيلٸك كومپانييالار سانى 2,1 مىڭعا ازايعان (ول كەزدە بۇل كٶرسەتكٸش 19,7 مىڭدى قۇراعان ەدٸ).
قىزىعى, رەسەيلٸك بيزنەستٸڭ قىسقارۋى بٸر عانا سالا ەمەس, ەكونوميكاداعى بارلىق باعىتىن قامتىپ وتىر. ەسٸرەسە, ەڭ كٶپ تٶمەندەۋ ساۋدا مەن IT سالاسىنا تيەسٸلٸ – جالپى قۇلدىراۋدىڭ 55%-ى دەل وسى سەكتورلار ەسەبٸنەن بولدى.
دەگەنمەن, بۇل جاعدايعا قاراماستان, رەسەي قازاقستانداعى شەتەلدٸك بيزنەس سانى بويىنشا كٶشباسشىلىقتى ساقتاۋدا. بٸراق, سوڭعى ۋاقىتتا رەسەي بيزنەسٸ شەگٸنٸپ جاتقاندا, كٶرشٸ ٶزبەكستان مەن قىتاي كەرٸسٸنشە, قارقىندى ٶسٸم كٶرسەتۋدە.
"ناقتىراق ايتساق, ٶزبەكستاندىق كاپيتالى بار كومپانييالار سانى بيىلعى سەۋٸر-ماۋسىم ايلارىندا بٸردەن 527 كەسٸپورىنعا كٶبەيٸپ, 5,4 مىڭعا جەتتٸ. بۇل ٶسٸمنٸڭ بارلىعى دەرلٸك قىزمەت كٶرسەتۋ سالاسىنىڭ ٷلەسٸنە تيەسٸلٸ. ال قىتايلىق بيزنەس وسى كەزەڭدە 503 كومپانيياعا ارتىپ, جالپى سانى 4,5 مىڭ كەسٸپورىنعا جەتكەن. بۇل ٶسٸمنٸڭ 40%-ى ساۋدا سالاسى ارقىلى قامتاماسىز ەتٸلگەن. الايدا ٶزبەكستان مەن قىتاي بيزنەسٸ قانشا قارقىنمەن ٶسسە دە, جالپى شەتەلدٸك كومپانييالاردىڭ كٶرسەتكٸشٸنە شەشۋشٸ ەسەر ەتەتٸن رەسەيلٸك بيزنەستٸڭ ديناميكاسى بولىپ قالۋدا. نەتيجەسٸندە قازاقستاندا شەتەلدٸك كاپيتالى بار كومپانييالار سانى بيىلعى ەكٸنشٸ توقساندا جالپى العاندا 254 كەسٸپورىنعا ازايىپ, بٷگٸندە 44,7 مىڭ كومپانييانى قۇراپ وتىر. وسىلايشا, رەسەيدەن كەلگەن كەسٸپكەرلەردٸڭ كەتۋٸ قازاقستانداعى شەتەلدٸك بيزنەستٸڭ جالپى كٶرسەتكٸشٸنە تەرٸس ىقپال ەتٸپ وتىر", - دەيدٸ DATA HUB ساراپشىلارى.
بۇعان دەيٸن سايتىمىزدا "رەسەيدٸڭ ۇلتتىق قورى سارقىلۋ, ەكونوميكاسى رەتسەسسييا الدىندا تۇر" دەگەن ماقالا جارييالانعان بولاتىن.
