امانتاي-قاجى دەگەن اتپەن تانىمال قازاقستاندىق انتيادرولىق قوزعالىستىڭ بەلسەندىسى امانتاي اسىلبەك تاعى دا الەۋمەتتىك جەلىدە جارق ەتتى. ءبىراق پرەزيدەنت سايلاۋىندا ءوز كانديداتتىعىن بىرنەشە رەت ۇسىنعان قاجى بۇل جولى قىلمىستىق ءىستىڭ فيگۋرانتى اتاندى، دەپ حابارلايدى Dalanews.kz.
جەلىدە تاراعان ۆيدەودا امانتاي-قاجى ءبىر عيماراتقا كىرىپ بارا جاتادى. سول كەزدە ارتىنان سويلەي، وزىمەن بىرگە ىلەسە جۇرگەن ايەلدى ول كەۋدەسىنەن يتەرىپ جىبەرەدى. ايەل عيمارات ەسىگى الدىنداعى تابالدىرىق باسپالاعىنان ارتقا شالقاسىنان قۇلايدى. ونىڭ جامباس سۇيەگى سىنعانى بەلگىلى.
الماتى قالالىق پوليسيا دەپارتامەنتىنىڭ (پد) باسپا ءسوز قىزمەتى المالى اۋدانىنىڭ پوليسيا باسقارماسى اتالعان فاكتى بويىنشا قىلمىستىق ءىس قوزعاعانىن ناقتىلادى، دەپ جازادى Zakon.kz.
قازىرگى ۋاقىتتا بولعان وقيعانىڭ بارلىق ءمان-جايلارىن انىقتاۋعا باعىتتالعان تەرگەۋ جانە پروسەستىك شارالار كەشەنى جۇرگىزىلۋدە.
"قاجەتتى سوت-مەديسينالىق ساراپتامالار تاعايىندالدى. تەرگەۋ بارىسى الماتى پوليسياسى باسشىلىعىنىڭ باقىلاۋىندا"، - دەيدى الماتى قالالىق پوليسيا دەپارتامەنتىنىڭ باسپا ءسوز قىزمەتى.
بۇعان دەيىن الماتى وبلىسىندا جول ۇستىندە رەسەيلىك بلوگەردى توقتاتقان پوليسەيدىڭ باسى داۋعا قالعانىن جازعان ەدىك.
