بورودۋليحا اۋدانىنىڭ پروكۋراتۋراسى ءۇش ورتا مەكتەپتىڭ 194 قىزمەتكەرىنىڭ جەكە مالىمەتتەرىنىڭ تاراپ كەتكەنىن انىقتادى. بۇل زاڭبۇزۋشىلىق مەملەكەتتىك ساتىپ الۋلار پورتالىنا مونيتورينگ جۇرگىزۋ بارىسىندا بەلگىلى بولدى، دەپ حابارلايدى Dalanews.kz.
ءبىلىم بەرۋ مەكەمەلەرى مەملەكەتتىك ساتىپ الۋ بويىنشا مەديسينالىق تەكسەرۋدەن ءوتۋ ءۇشىن قىزمەتكەرلەردىڭ تىزىمدەرىن جاريالاعان، وندا بارلىق قىزمەتكەرلەردىڭ جەكە مالىمەتتەرى، ونىڭ ىشىندە تولىق انكەتالىق مالىمەتتەر، جسن جانە باسقا دا اقپاراتتار كورسەتىلگەن.
قولدانىستاعى زاڭناماعا سايكەس، مۇنداي مالىمەتتەر مىندەتتى تۇردە قورعالۋعا ءتيىس. شەكتەۋلى قولجەتىمدى اقپاراتقا قول جەتكىزگەن تۇلعالار ونىڭ قۇپيالىلىعىن قامتاماسىز ەتۋگە مىندەتتى جانە مالىمەتتەر يەسىنىڭ كەلىسىمىنسىز نەمەسە زاڭدى نەگىز جوق جاعدايدا جەكە اقپاراتتى تاراتۋعا قۇقىلى ەمەس.
مەكتەپ باسشىلىعىنىڭ بۇل تالاپتاردى ساقتاماۋى جەكە مالىمەتتەردىڭ زاڭسىز ماقساتتا پايدالانىلۋ ءقاۋپىن تۋعىزدى.
تەكسەرۋ قورىتىندىسى بويىنشا اۋدان پروكۋراتۋراسى مەكتەپ ديرەكتورلارىن ق ر اكىمشىلىك قۇقىق بۇزۋشىلىقتار تۋرالى كودەكسىنىڭ 79-بابى 2-بولىگى بويىنشا اكىمشىلىك جاۋاپكەرشىلىككە تارتىپ، 1 ميلليون تەڭگەدەن استام ايىپپۇل سالدى، سونداي-اق ولار تارتىپتىك جازاعا تارتىلدى.
قازىرگى ۋاقىتتا اۋداندىق ءبىلىم ءبولىمى بولاشاقتا ۇقساس بۇزۋشىلىقتاردىڭ الدىن الۋ ماقساتىندا شارالار قابىلداعان.
