بۇگىن ءى. جانسۇگىروۆ اتىنداعى جەتىسۋ ۋنيۆەرسيتەتىندەگى قابىلداۋ كوميسسياسىنىڭ جۇمىسىمەن تانىسۋ ماقساتىندا جەتىسۋ وبلىسى اكىمىنىڭ ورىنباسارى مارلەن كولبايەۆ ارنايى كەلدى. جالپى، ەلىمىز بويىنشا قابىلداۋ كوميسسيالارى جۇمىسىن 20 ماۋسىمدا باستاعان. ماۋسىمدىق ناۋقاننىڭ جۇمىسىن ءتيىمدى ۇيىمداستىرۋ بارلىق جوعارى وقۋ ورىندارى ءۇشىن وتە ماڭىزدى. جەتىسۋ ۋنيۆەرسيتەتى – وڭىردەگى بىردەن-بىر وقۋ ورنى بولعاندىقتان، بۇل ىسكە ۇلكەن جاۋاپكەرشىلىكپەن قارايدى.

ۋنيۆەرسيتەت اكىمشىلىگى قابىلداۋ كوميسسياسىنىڭ جۇمىسى باستالعان كۇننەن باستاپ تالاپكەرلەر مەن ولاردىڭ اتا-انالارى ءۇشىن بارلىق قولايلى جاعدايدى قاراستىردى. ۋنيۆەرسيتەت اۋلاسىنا ارنايى شاتىرلار قۇرىپ، قوسىمشا ورىندىقتار قويىپ، اۋىز سۋ قوندىرعىلارىن ورناتتى. 13 شىلدەدە مەملەكەتتىك ءبىلىم بەرۋ گرانتىنا قۇجاتتار قابىلداۋ باستالعانى بەلگىلى. وسى ارالىقتا قابىلداۋ كوميسسياسىنىڭ جۇمىسى كۇشەيتىلىپ، بارلىق رەسۋرستار ىسكە قوسىلدى. قابىلداۋ كوميسسياسى دەمالىسسىز جۇمىس كەستەسىنە كوشتى.

قۇجات قابىلداۋ ناۋقانى تالاپقا ساي ۇيىمداستىرىلىپ، بارلىق ۇمىتكەرلەرگە جوعارى دەڭگەيدە قىزمەت كورسەتىلۋدە. وبلىس اكىمىنىڭ ورىنباسارى مارلەن كولبايەۆ قابىلداۋ كوميسسياسىنىڭ جۇمىسىمەن جاقىنىراق تانىسىپ، قۇجات وتكىزۋگە كەلگەن تالاپكەرلەر جانە ولاردىڭ اتا-انالارىمەن تىلدەستى. ۋنيۆەرسيتەت باسشىلىعىنىڭ تالاپكەرلەر ءۇشىن جاساعان قولايلى جاعدايىن كورىپ، قىزمەتكەرلەرگە ءار تالاپكەرگە ىزەتتىلىكپەن قاراپ، بارلىق سۇراقتارىنا مۇقيات جاۋاپ بەرۋدى تاپسىردى.

ءوتىنىش بىلدىرگەن بارلىق تالاپكەرلەردىڭ قۇجاتى مىندەتتى تۇردە قابىلدانادى. كەزەك تالون ارقىلى ەلەكتروندى تۇردە بەلگىلەنەدى. اتا-انالارعا ۋايىمداپ، تاڭنان كەلىپ كەزەك الۋدىڭ ەش قاجەتى جوق. بارلىق تالاپكەرلەر قۇجات تاپسىرىپ ۇلگەرەدى. قابىلداۋ كوميسسياسىنىڭ جۇمىسى باسقارما ءتوراعاسى – رەكتوردىڭ باقىلاۋىندا.

ەستەرىڭىزگە سالا كەتەيىك، مەملەكەتتىك ءبىلىم گرانتىنا قۇجات قابىلداۋ 13–20 شىلدە ارالىعىندا وتەدى.