رەسەي فەدەراسياسى قازاقستاننان جەتكىزىلگەن ءىرى كولەمدەگى ازىق-تۇلىك ونىمدەرىن شەكارادا وتكىزبەي، كەرى قايتاردى، دەپ حابارلايدى Dala News.
رەسەيدىڭ ۆەتەرينارلىق جانە فيتوسانيتارلىق باقىلاۋ قىزمەتىنىڭ ۋرال ءوڭىرارالىق باسقارماسىنىڭ مالىمەتىنشە، 2026 جىلعى 13-19 ءساۋىر ارالىعىندا چەليابى وبلىسىنداعى قازاقستانمەن شەكارالاس «بۋگريستوە» جانە «نيكولايەۆكا» اۆتوموبيلدىك وتكىزۋ بەكەتتەرىندە تاۋلىك بويى باقىلاۋ جۇرگىزىلگەن.
تەكسەرۋ ناتيجەسىندە قازاقستاننان رەسەيگە باعىتتالعان جانۋار تەكتەس ونىمدەردىڭ ءىرى پارتياسى تالاپتارعا سايكەس كەلمەيتىنى انىقتالعان. اتاپ ايتقاندا، 12 جۇك كولىگىمەن تاسىمالدانعان جالپى سالماعى 279،3 توننا بولاتىن بالمۇزداق پەن يوگۋرت تۇراقتاندىرعىشى ەل اۋماعىنا كىرگىزىلمەگەن.
ينسپەكتورلاردىڭ ايتۋىنشا، نەگىزگى سەبەپ – ۆەتەرينارلىق ىلەسپە قۇجاتتارداعى ولقىلىقتار. قۇجاتتاردا ءونىمنىڭ ناقتى قاي ءوندىرىس ورنىنان شىققانى كورسەتىلمەگەن. بۇل ءونىمنىڭ تولىق قاداعالانۋىن، ياعني ونىڭ شىعۋ تەگى مەن قاۋىپسىزدىگىن باقىلاۋدى مۇمكىن ەمەس ەتەدى. وسىعان بايلانىستى جۇك رەسەي اۋماعىنا جىبەرىلمەي، كەرى قايتارىلعان.
سونىمەن قاتار سول كەزەڭدە وزبەكستاننان جەتكىزىلگەن 1 728 ارا پاكەتى دە رەسەيگە كىرگىزىلمەگەن. بۇل جاعدايدا دا ۆەتەرينارلىق قۇجاتتار تالاپتارعا ساي بولماعانى انىقتالعان.
بۇدان بولەك، كەرى باعىتتاعى تاسىمالداۋدا دا زاڭبۇزۋشىلىقتار تىركەلگەن. رەسەيدەن قازاقستانعا جونەلتىلگەن 2،5 توننا مۇزداتىلعان تەڭىز بالىعى شەكارادا توقتاتىلعان. تەكسەرۋ بارىسىندا بۇل ءونىمدى جونەلتكەن كاسىپورىنداردىڭ ەۋرازيالىق ەكونوميكالىق وداقتىڭ ءتيىستى رەەسترىنە ەنگىزىلمەگەنى بەلگىلى بولعان. ياعني، ولار مۇنداي ءونىمدى ەكسپورتتاۋعا قۇقىعى جوق بولىپ شىققان. وسىعان بايلانىستى جۇك زاڭ تالاپتارىنا سايكەس كەرى قايتارىلعان.
رەسەي تاراپى مۇنداي شارالار ءونىم قاۋىپسىزدىگىن قامتاماسىز ەتۋ جانە ۆەتەرينارلىق تالاپتاردىڭ ساقتالۋىن باقىلاۋ ماقساتىندا قابىلداناتىنىن اتاپ ءوتتى.
ايتا كەتەيىك، ەۋرازيالىق ەكونوميكالىق وداق اياسىندا ازىق-تۇلىك ونىمدەرىن تاسىمالداۋ كەزىندە ءونىمنىڭ شىعۋ تەگى، قاۋىپسىزدىگى جانە ءوندىرۋشى كاسىپورىن تۋرالى تولىق ءارى ناقتى اقپاراتتىڭ بولۋى مىندەتتى تالاپ بولىپ سانالادى. قۇجاتتاعى كەز كەلگەن سايكەسسىزدىك ءونىمنىڭ شەكارادان وتپەۋىنە نەگىز بولا الادى.
