«HHI ǵasyrdyń belsendi azamattary básekege qabiletti bolýy tiis. Qazirgi kezeńde elge qyzmet etip otyrǵan azamattar shyǵarmashylyqqa beiim, erkin oily, kreativti ári ziialy bolǵany jón. Atalǵan izgi qasietter barlyq sala qyzmetkerleriniń boiynan tabylýy qajet. Bul — búgingi zamannyń talaby. Búgin talai syndardan súrinbei ótken naǵyz dúldúlder ortamyzǵa kelip otyr. Osynaý jetistikterińizben shyn júrekten quttyqtaimyn! Aldaǵy ýaqytta da memleket pen qoǵam múddesi jolynda talmai eńbek etip, belsendi azamattyq ustanymmen ortaq maqsatty júzege asyrýǵa úles qosatyndyqtaryńyzǵa senimdimin. Túrkistanǵa qyzmet etý — abyroily mindet. Búgingi marapattaryńyz sizderge shabyt berip, jańa shyńdarǵa jeteleidi dep oilaimyn», — degen oblys ákimi jyldyń úzdigi atanǵan azamattardy marapattady.
Saltanatty is-sharada jyldyń úzdik 15 mekemesi men kásipornyna marapat tapsyryldy. Olardyń arasynda «Green Technology Industries» JShS, «Yrys» mikroqarjy uiymy, oblystyq klinikalyq aýrýhanasy jáne ózge de mekemeler bar. Sonymen birge, kásipkerlik, týrizm, ekonomika, qarjy, rýhaniiat jáne mádeniet, densaýlyq saqtaý, sport, qurylys, bilim, aýyl sharýashylyǵy, muraǵat, turǵyn úi – kommýnaldyq sharýashylyq, energetika jáne ózge de salalar boiynsha 40 adam marapattaldy. Jyldyń úzdik sportshysy ataǵyna Didar Hamza ie bolsa, Ádihan Polatbekov jyldyń úzdik qurylysshysy dep tanylǵan. Jyl agronomy bolyp Bolatbek Qumetov tanylsa (Shardara aýdany), Muqaǵali Kenjetaiuly jyl aqyny atandy. Baiqap otyrǵandaryńyzdai, marapattalǵandardyń arasynda qarapaiym jumysshydan bastap bilikti basshylar da bar.
Sondai-aq, osy jiynda «Salanyń úzdik memlekettik qyzmetshi» atalymy boiynsha 7 adamǵa qurmet kórsetildi. Jyldyń eń úzdik qyzmetkerleri marapattalǵan jiynda oblystyń óner ujymdary óner kórsetip, kontserttik baǵdarlamasyn usyndy.
Túrkistan oblysy ákiminiń baspasóz qyzmeti
