Búgin Túrkistan qalasynda oblys ákimi Janseıit Túımebaevtyń qatysýymen zamanaýı jańa avtobeket qurylysynyń irgetasyn qalaý rásimi ótti. Jańa avtobeket 3 gektar aýmaqta ornalasatyn bolady. Aldaǵy ýaqytta táýligine 10 myń jolaýshyǵa, ıaǵnı 600 avtobýsqa qyzmet kórsetpek. Saltanatty sharaǵa qatysqan oblys basshysy óńir turǵyndaryn aıtýly jańalyqpen quttyqtady.

«Búgin Túrkistan qalasynda taǵy bir jaǵymdy oqıǵanyń kýási bolyp otyrmyz. El tilegi eskerilip, kıeli shaharymyzda taǵy bir avtobekettiń irgetasy qalanǵaly tur. Qala ortalyǵyndaǵy kólik jáne jolaýshylar júktemesin azaıtyp, ekologıalyq jaǵdaıdy jaqsartý maqsatynda Shymkent baǵytynan zamanaýı jańa avtobeket salǵaly otyrmyz. Nysannyń ǵımaraty  2880 sharshy metrdi  quraıtyn bolady. Onda kútý zaly, bılet kasalary, júrgizýshilerdi medısınalyq kýálandyrý pýnkti, dıspecherlik pýnkt, ana men bala bólmesi qarastyrylǵan. Jobaǵa sáıkes, avtoturaq, perron, avtobýstardy tehnıkalyq baıqaý jáne qadaǵalaý jaılary ornalasady. Avtobeket qurylysy aıaqtalǵannan keıin shamamen 50-ge jýyq adam jańa jumyspen qamtylatyn bolady. Endeshe qurylystyń sátti aıaqtalýyn tileımin», - dedi Janseıit Qanseıituly.

Jobanyń jalpy quny - 1 mlrd. 875 mln. teńge. Avtoturaq pen beket aldyndaǵy alańnyń aýmaǵy – 3400 sharshy metr, otyrǵyzý perrony – 3600 sharshy metr, jolaýshylardy túsirý perrony – 1100 sharshy metr, al kógaldandyrý aımaǵy – 6000 sharshy metrdi quraıdy. Jańa avtobekettiń qurylysyn 2019 jyldyń jeltoqsanyna deıin tolyq aıaqtaý josparlanǵan.



Túrkistan oblysy ákiminiń baspasóz qyzmeti