Tólebi aýdanynda úsh aýylǵa gaz kirdi
– Qurmetti, Alataýdyń baýraiyna jaqyn ornalasqan Tólebi aýdanynyń jurtshylyǵy. Egemendi elimizdiń Táýelsizdik toiynyń toilanyp, jańa jylǵa aiaq basqan tusynda aýyldaryńyzǵa jetip otyrǵan kógildir otyn barshalaryńyzǵa qutty bolsyn! Jalpy, óńirimizdegi basqa aýdan, qalalarmen salystyrǵanda Tólebidiń eldi mekenderin tabiǵi gazben qamtý isi qarqyndy júrýde. Iaǵni, aldaǵy birer jylda aýdandaǵy barlyq eldi mekender gazdandyrylyp, qalanyń jaǵdaiyna jetetin bolady. Munyń barlyǵy da Elbasymyzdyń jyl saiynǵy bizderge arnalǵan Joldaýlary men tiisti mindettemeleriniń arqasynda múmkin bolyp otyrǵan jaǵdai dep bilemin, – dedi oblys basshysy.
Qazirgi tańda Tólebi aýdanynda jalpy sany 55 eldi mekenniń, búgingimen qosqanda, 39-na tabiǵi gaz jetip, kógildir otynmen qamtý úlesi halyqtyń 82 paiyzyn qurady. 2017-2018 jyldary 8 eldi mekenge (Maibulaq, Qostóbe, Ońtústik, Hanaryq, Jambyl, Janaturmys, Nysanbek, Qainar) oblystyq biýdjetten qurylys jumystaryna 928,4 mln teńge bólinip, tabiǵi gazben qamtamasyz etý boiynsha qurylys jumystary tolyǵymen aiaqtaldy. Osy jyly qosymsha 2 eldi mekende (Qaratóbe, Tasaryq) gazdandyrý qurylysy júrgizildi. Qurylysy aiaqtalǵan 10 eldi mekendi kezeń-kezeńimen gazǵa qosyp 49 eldi meken nemese 91 paiyzǵa jetkizý jumystary josparlanyp otyr. Qosymsha gazdanbaǵan 6 eldi meken boiynsha JSQ ázirleý maqsatynda oblystyq, aýdandyq biýdjetten 50 mln. teńgege jýyq qarjy qarastyrylyp, jobalyq-smetalyq qujattary ázirlenip, memlekettik saraptamanyń oń qorytyndysyn alý josparlanǵan.
Jalpy aýdan halqyn 2019-2020 jyldar aralyǵynda 100% tabiǵi gazben qamtamasyz etý josparlanǵan.
Túrkistan oblysy ákiminiń baspasóz qyzmeti
