– قۇرمەتتى، الاتاۋدىڭ باۋرايىنا جاقىن ورنالاسقان تولەبي اۋدانىنىڭ جۇرتشىلىعى. ەگەمەندى ەلىمىزدىڭ تاۋەلسىزدىك تويىنىڭ تويلانىپ، جاڭا جىلعا اياق باسقان تۇسىندا اۋىلدارىڭىزعا جەتىپ وتىرعان كوگىلدىر وتىن بارشالارىڭىزعا قۇتتى بولسىن! جالپى، وڭىرىمىزدەگى باسقا اۋدان، قالالارمەن سالىستىرعاندا تولەبيدىڭ ەلدى مەكەندەرىن تابيعي گازبەن قامتۋ ءىسى قارقىندى جۇرۋدە. ياعني، الداعى بىرەر جىلدا اۋدانداعى بارلىق ەلدى مەكەندەر گازداندىرىلىپ، قالانىڭ جاعدايىنا جەتەتىن بولادى. مۇنىڭ بارلىعى دا ەلباسىمىزدىڭ جىل سايىنعى بىزدەرگە ارنالعان جولداۋلارى مەن ءتيىستى مىندەتتەمەلەرىنىڭ ارقاسىندا مۇمكىن بولىپ وتىرعان جاعداي دەپ بىلەمىن، – دەدى وبلىس باسشىسى.
قازىرگى تاڭدا تولەبي اۋدانىندا جالپى سانى 55 ەلدى مەكەننىڭ، بۇگىنگىمەن قوسقاندا، 39-نا تابيعي گاز جەتىپ، كوگىلدىر وتىنمەن قامتۋ ۇلەسى حالىقتىڭ 82 پايىزىن قۇرادى. 2017-2018 جىلدارى 8 ەلدى مەكەنگە (مايبۇلاق، قوستوبە، وڭتۇستىك، حانارىق، جامبىل، جاناتۇرمىس، نىسانبەك، قاينار) وبلىستىق بيۋدجەتتەن قۇرىلىس جۇمىستارىنا 928،4 ملن تەڭگە ءبولىنىپ، تابيعي گازبەن قامتاماسىز ەتۋ بويىنشا قۇرىلىس جۇمىستارى تولىعىمەن اياقتالدى. وسى جىلى قوسىمشا 2 ەلدى مەكەندە (قاراتوبە، تاسارىق) گازداندىرۋ قۇرىلىسى جۇرگىزىلدى. قۇرىلىسى اياقتالعان 10 ەلدى مەكەندى كەزەڭ-كەزەڭىمەن گازعا قوسىپ 49 ەلدى مەكەن نەمەسە 91 پايىزعا جەتكىزۋ جۇمىستارى جوسپارلانىپ وتىر. قوسىمشا گازدانباعان 6 ەلدى مەكەن بويىنشا جسق ازىرلەۋ ماقساتىندا وبلىستىق، اۋداندىق بيۋدجەتتەن 50 ملن. تەڭگەگە جۋىق قارجى قاراستىرىلىپ، جوبالىق-سمەتالىق قۇجاتتارى ازىرلەنىپ، مەملەكەتتىك ساراپتامانىڭ وڭ قورىتىندىسىن الۋ جوسپارلانعان.
جالپى اۋدان حالقىن 2019-2020 جىلدار ارالىعىندا 100% تابيعي گازبەن قامتاماسىز ەتۋ جوسپارلانعان.
تۇركىستان وبلىسى اكىمىنىڭ باسپا ءسوز قىزمەتى
