«Qazatomónerkásip» ulttyq atom kompaniiasynyń tóraǵasy Nurlan Qapparov kásiporynnyń Ońtústik Qazaqstandaǵy óndiris oryndarymen tanysty.
Nurlan Qapparovtyń salamen tanysý saparyn osy ońtústik óńirden bastaýy tegin emes. Búginde Qazatomónerkásipke qarasty jalpy ýran óndirýshi 20 kenishtiń 15-si Ońtústikte ornalasqan. Al is sapar otandyq ýran óndirisindegi eń kóne kásiporyn - Taýkent taýken himiia kásiporny ornalasqan Sozaq aýdanyndaǵy Taýkentten bastaldy. Kompaniia basshysy at basyn áýeli áleýmettik nysandarǵa buryp 440 oryndyq «Taýkent gúlderi» balabaqshasymen, I. Keńesbaev atyndaǵy orta mekteppen, kúnine 100 asa adamdy qabyldai alatyn emhana jáne 40 tósektik aýrýhanasy bar dárigerlik-sanitarlyq bólimniń jumysymen tanysty.
Artynsha Taýkent taýken himiia kásiporynda bolǵan Qazatomónerkásip basshylary óndiris basyndaǵy mamandarmen kezdesti. 40 jyldyq tarihy bar dańqty kásiporynnyń áli de bolsa áleýeti myqty, óndiristik josparlaryn oryndap keledi. Árine, jetistiktermen qatar ózindik problemalar da jetkilikti. Kezdesý barysynda munyń barlyǵy ortaǵa salynyp, mindetter aiqyndaldy. Munan soń Nurlan Qappparov «Katko» Qazaqstan-Frantsiia birlesken kásipornynda boldy. Mundaǵy jumysshylar aktivimen kezdesý negizinen tehnologiialyq úderisterge qatysty boldy.
Otandyq ýran ónerkásibiniń taǵy bir kóne kásiporny - «Stepnoe KB» JShS-de bolǵan Qazatomónerkásiptiń basqarma tóraǵasy«Ýanas» ýran kenishin aralady. Mundaǵy jumystar da ýaqyt talabyna sai uiymdastyrylyp kele jatqany, eńbek adamy men turǵyndarǵa jasalǵan qamqorlyqtar az emestigi birden baiqalady.
Kenishterge jaqyn ornalasqan aýyl jastarynyń basym bóligi óz taǵdyryn osy salamen bailanystyrǵan. Nurlan Jambyluly sapar aiasynda jas mamandarmen kezdesip, pikir almasty. Osy rette kóńil bólerlik bir jait, ýran ónerkásibinde jergilikti mamandardyń, onyń ishinde jastardyń úlesi artyp keledi. Almatydaǵy Qazaq ulttyq tehnikalyq ýinversitetin, Tomsk politehnikalyq institýtyn, tipti shet elderdegi aitýly tehnikalyq oqý oryndaryn bitirip shyqqan olar óndiris tizginin óz qoldaryna alyp, ortaq maqsat jolynda bilek sybana iske kirisip jatyr.
Jurt sheteldik kompaniiadaǵy jaǵdai otandyq kásiporynǵa qaraǵanda áldeqaida artyq dep oilaityny jasyryn emes. Alaida jańadan iske qosylyp jatqan atom kompaniiasynyń óndiris oryndary bul taptaýryn túsinikti buza bastady. Qazatomónerkásiptiń 100 paiyz enshiles kásiporny sanalatyn «Ortalyq» óndirýshi kásiporny» JShS mysalynan da baiqaýǵa bolady. Tabiǵaty qatal Betpaqdalanyń tósinde ornalasqan kásiporynda – ne qajettiń bári óte joǵary deńgeide uimdastyrylǵan.Tehnologiialyq úderis tolyq avtomattandyrylyp, qorshaǵan ortaǵa tastalatyn shyǵyndylar kólemi barynsha azaiǵan. Kenishterdegi radiatsiialyq fon tabiǵi mólsherden aspaitynyn arnaiy ornatylǵan aspaptar kórsetip turady.
Sapardyń sońynda Nurlan Qapparov Qazaqstan men Resei birlesken kásiporny - «Qarataý» JShS-ge at basyn burdy. «Býdenovskoe ken ornyn igerip jatqan kásiporynnyń tóńiregi jasyl jelekke malynyp turǵany mundaǵy ekologiialyq ahýaldyń tazalyǵyn kýálandyrǵandai» dedi óz kezeginde sala basshysy. Soǵan orai bolashaqta «Green Mining» - jasyl óndiris oryndaryn kóbeitýdi qolǵa alý uiǵaryldy. Buǵan múmkindik te mol.
Ońtústik Qazaqstan oblysynda onalasqan ýran óndirýshi 10 kásiporynnyń jumysymen tanysqan «Qazaatomónerkásip» UAK» AQ Basqarma Tóraǵasy Nurlan Qapparov Shymkentte oblys ákimi Asqar Myrzahmetovpen kezdesip, aldaǵy ýaqytta birlese atqarar jobalardy aiqyndady. Óńir basshysy ulttyq atom kompaniiasyna qarasty kásiporyndardyń túrli jobalardy qoldaýdaǵy naqty kómegine rizashylyǵyn aityp, usynystaryn ortaǵa saldy. Ákim ásirese biznestiń áleýmettik jaýapkershiligi sheńberindegi jobalarǵa kóńil boldy. Asqar Myrzahmetov ýran óndirisine qajetti mamandar daiarlaý úshin kolledj ashýdyń qajettiligin qadap aitty. Kompaniianyń menshiginde bolǵan áleýmettik nysandardy aýdan ákimdikterine berýdegi birqatar túitkildi máselelerdi birlese qarap, qos tarapqa da tiimdi ońtaily sheshim qabyldaý kerektigine toqtaldy.
«Qazatomónerkásip» UAK» AQ Basqarma Tóraǵasy Nurlan Qapparov uynystardyń jan-jaqty qaralatyndyǵyn jáne oblys boiynsha óndiris kólemi jáne jumys orny qysqarmaitynyn tilge tiek etti.
"Qala men Dala"
