Qoldanystaǵy zańnamaǵa sáikes qyzmetker men jumys berýshi arasyndaǵy eńbek daýlary belgili bir tártippen júrýi tiis. Bul eki taraptyń óz ustanymdaryn egjei-tegjeili túsindire otyryp, qarama-qarsy dálelderdi tyńdai alatyn syndarly dialog joly.
Alaida, kóp jaǵdaida taraptardyń biri belgilengen tártipti elemei, óz máselelerin ýltimatým qoiý arqyly, zańsyz ereýilder ótkizý arqyly sheshkisi keledi. Ókinishke orai, mundai jaǵdaiǵa arandatýshylardyń sózine ergen kásiporyn qyzmetkerleri baryp jatady.
Bul jaǵdaida jumys berýshi ereýildi zańsyz dep taný úshin sotqa júginýge jáne sot oń sheshim qabyldaǵan jaǵdaida jumystan bosatýǵa deiin sharalar qabyldaýǵa quqyly.
Jańaózen qalasy ákimdiginiń aldynda turǵan jumysshylardyń buryn eńbek etken kompaniialary búgingi kúni shtattyq rejimde jumys isteýde.
Jumys berýshiler kelissóz kezinde qyzmetkerlerine barlyq zańdardy alǵa tarta otyryp, zańsyz áreketter jasamaýǵa shaqyrǵan. Alaida túsindirme jumystary nátijesiz aiaqtalyp, kompaniia basshylyǵy ujymnyń ózge qyzmetkerlerine kedergi keltirgen azamattardy sotqa berip, jumystan shyǵarýǵa májbúr boldy.
Sot sheshimimen jumystan bosap qalǵan jumysshylar qala ákimdigine burynǵy jumysyna qaitarýdy talap etip keldi. Alaida, memlekettik organdardyń jeke kompaniialarǵa qandai da bir adamdy jumysqa ornalastyrý týraly nusqaý berýine quqyǵy joq.
Biz áriptesterimizben osy kompaniialardyń jumys berýshilerimen jáne jumysshylarymen birneshe ret kezdesip, sóilestik. Biz máseleni daý-damaisyz sheshýge shaqyrdyq.
Jumys berýshi qyzmetkerlerine ádil bolyp, eńbek etýlerine qolaily jaǵdai jasaýǵa tyrysýlary qajet. Al, qyzmetker eńbek shartynda kórsetilgen mindettemelerdi adal oryndaýǵa tiis.
Ereýilge shyqqan barlyq qyzmetkerlerge zańsyz áreketteri úshin jumystan shyǵyp qalýlary múmkin ekendigi eskertildi. Alaida, muny túsinip, ereýilge shyqqan jumysshylar ereýildi toqtatvp, jumysyn qaita bastaýdan bas tartty.
Ókinishke orai, kóp jaǵdaida taraptar konstrýktivti dialogqa kelmei, máseleni zańsyz mitingiler men ereýilder arqyly sheshýge umtylady. Bunyń sońy jaqsylyqqa ákelmeidi.
Jumys berýshi jumysshylardyń shtaty men qyzmetkerlerdiń jalaqysyn aýadan alyp, kóbeite almaidy. Bul naryq zańy. Eger jumys berýshiniń qarjylyq jaǵdaiy tómendese, óndiris kólemi múldem joǵalyp, tapsyrys berýshiniń aldyndaǵy mindettemelerin oryndai almai qalady. Ol qyzmetkerlerdiń jumyssyz qalýyna alyp kelýi múmkin.
Qadirli jerlester!
Álemdegi kúrdeli ekonomikalyq jáne geosaiasi jaǵdaidy eskere otyryp, qazirgi ýaqytta bárimizge birlik pen shydamdylyq tanytý qajet.
Sondai-aq, bizge bekitilgen algoritmnen ainalyp ótip, munai salasyna kezeksiz jumysqa ornalasýdy talap etetin jumyssyzdar sanatyndaǵy azamattar ótinish bildirýde.
Men olarǵa bul jóninde bir emes birneshe ret aittym. Taǵy qaitalap aitamyn – kezekten tys jumysqa ornalasýǵa bolmaidy. Óitkeni bul kezekte turǵan basqa kandidattarǵa ádiletsizdik bolady. Sizdiń kezegińiz kelgenshe, óz kezegińizdi saqtai otyryp, jumyspen qamtý ortalyǵy usynatyn 150 000-nan 200 000 myń teńgege deiingi jalaqsy bar basqa oryndarda jumys istei alasyzdar.
Men óz tarapymnan osy protsestiń ashyqtyǵy men ádiletti bolaryna kepildik beremin.
Zańsyz talaptardyń sońy bizdi eshqandai jaqsylyqqa aparmaidy. Biz siqyrshy emespiz jáne munai salasynda myńdaǵan jumys oryny qysqa merzimde qura almaimyz. Biraq biz qarap otyrǵan joqpyz. Shaǵyn jáne orta biznes kásiporyndarynda jańa jumys oryndaryn ashyp, óńirlik memlekettik baǵdarlamalardy engize otyryp, ekonomikany ártaraptandyrýǵa basymdyq berip jatyrmyz.
Barshańyzdy qalamyzdy kórkeitý úshin judyryqtai jumylyp, aýyzbirshilikte eńbek etýge shaqyramyn.
Aibek QOSÝAQOV, Jańaózen qalasynyń ákimi
