Qazaqstan Ulttyq bank tóraǵasy Timýr Súleimenov 29 qarashada ótken brifingte 15-29 qarasha aralyǵynda - 14 kún boiy interventsiia júrgizgenderin, onyń kólemi 1 mlrd dollardy quraǵanyn jetkizdi. Qazir bul protsess toqtatylǵan, Ulttyq bank jaqyn arada valiýtalyq interventsiialar júrgizýdi josparlap otyrǵan joq, dep habarlaidy Dalanews.kz
Ol Ulttyq bank aqsha aiyrbas baǵamynyń deńgeiin aiqyndaýdy maqsat etpeitinin basa atap ótti.
"Bizde naryqtyń ózi suranys pen usynystyń balansy negizinde dollardyń baǵamy qandai bolatynyn anyqtaidy. Biz naryqta oiynshy retinde áreket etemiz, Ulttyq qordan bólingen transfertterdi aiyrbastaimyz, keide aqsha satyp alamyz. Biraq kez-kelgen kýrs, meili ol 500, 490, 510 teńge bolsyn, biz ony targettemeimiz. Biz óz qalaýymyzben interventsiia júrgizbeimiz, naryqta aiaq-asty dúrbeleń týyndaǵanda ony tynyshtandyrý úshin, iaǵni qajet bolǵandyqtan aralasamyz", - dedi Timýr Súleimenov.
Sonymen qatar, ol naryqta bir aptadan astam ýaqyt boiy eshkim dollar satpaǵanyn, nátijesinde syrtqy ekonomikalyq qyzmet sýbektileri úshin ótimdilikke úlken suranys qalyptasqanyn atap ótti.
"Biz interventsiialar júrgizdik. Qazir ony toqtattyq jáne qazirgi ýaqytta kýrs taza naryqtyq faktorlardyń áserinen qalyptasýda. Joǵaryda atap ótkenimdei, eger kúrt ózgerister, spekýliativtik áreketter, negizsiz irgeli nemese naryqtyq ósý faktorlary bolmasa, biz aralaspaimyz (valiýtalyq interventsiialar júrgizbeimiz)", - dedi Timýr Súleimenov.
Ol júrgizilgen valiýtalyq interventsiia kólemin de atap ótti.
"Ulttyq bank interventsiiany sońǵy ret 2022 jyldyń mamyrynda, iaǵni 2,5 jyl buryn ótkizgen. Bul infliatsiianyń kúrt ósimi jáne aqsha baǵamyndaǵy turaqsyzdyqqa bailanysty boldy. Onyń obektivti sebebi boldy, Ýkrainadaǵy soǵyspen bailanysty. Biz interventsiiany 2024 jyldyń 15-16 qarashasynan bastap, keshegi kúnge deiin júrgizdik: 1 milliard dollarǵa. 15-29 qarasha aralyǵynda - 14 kún boiy. Oǵan deiin interventsiia jasamadyq. Bul bizdiń sońǵy 2,5 jylda jasaǵan interventsiiamyz", - dep sózin túiindedi Ulttyq bank basshysy.
Aita ketsek, Ulttyq bank qor birjasynda valiýtalyq interventsiia júrgizip jatqanyn, aldymen sarapshylar boljady. Al Ulttyq bank muny teńge qunsyzdanǵanda keshe rastady.
