Arys qalasy, Syrdarıa eldi mekeninde ornalasqan S.Adambekov atyndaǵy mektep bıyl «Aýyldyq aımaqtardaǵy tirek mektepterdiń áleýetin damytý» jobasyna engen bolatyn. Osyǵan sáıkes, atalmysh mekteptiń bıyl 32 kabıneti men qosymsha bilim berý baǵyttary boıynsha stýdıalar tolyq jabdyqtaldy, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Búgin mektep qabyrǵasynda jobanyń saltanatty tanystyrylymy ótti. Sharaǵa Túrkistan oblysy ákiminiń orynbasary Beısenbaı Tájibaev, qala ákimi Gúljan Qurmanbekova, Qazaqstannyń eńbek sińirgen ustazy Kúlásh Shámshıdınova, «Qazaqstan Halqyna» qoǵamdyq qory tóraǵasynyń orynbasary Lázzat Shyńǵysbaeva men jobany júzege asyrǵan ardaqty azamattar men qala ustazdary qatysty.
Bul joba bilim berý sapasyn arttyrýǵa, aýyl mektepterine úzdik pedagogıkalyq tájirıbeler men tıimdi ádistemelerdi transfertteýge jáne tirek mektepterdiń qajetti materıaldyq-tehnıkalyq bazasymen qamtamasyz etýge baǵyttalǵan. Jobany Qazaqstan Respýblıkasynyń oqý-aǵartý mınıstrligi, «Qazaqstan halqyna» qory, AITAS holdıńi, Nazarbaev zıatkerlik mektepteri men Bilim berý salasyn turaqty damytý qory iske asyrdy.
Atalǵan joba aıasynda S.Adambekov mektebiniń synyptarda jıhazdar jańartyldy, ergonomıkalyq oryndyqtar men partalar qoıyldy. Sondaı-aq, fızıka, hımıa, matematıka, bıologıa, geografıa, ınformatıka, jaratylystaný kabınetteri naǵyz zamanaýı bilim berý synyptaryna aınaldy. Interaktıvti panelder men zerthanalyq jabdyqtar qoıyldy. Budan bólek, STEM zerthanasy jáne robototehnıka kabıneti tereńdetilgen bilim alý úshin shaǵyn gıdroponıka zerthanasymen, synaqtarǵa qajetti 3D prınterlermen, vırtýaldy shyndyq kabınetterimen jabdyqtalǵan.
Sabaq arasyndaǵy úzilisti oqýshylar tıimdi ótkizý úshin rekreasıalyq demalys aımaǵyna oqýshylarǵa arnalǵan oıyndary bar arnaıy oıyndar, shahmat aımaǵy, yńǵaıly jıhazdarmen tolyqqan. Sharaǵa qatysqan ustazdar men ardagerler jobany júzege asyrǵan azamattarǵa shynaıy alǵystaryn bildirdi.
Jumys sapary barysynda Beısenbaı Dáýletuly Arys qalasy ákimimen birge Otyrar turǵyn aýdanynda boı kóterip jatqan 600 oryndyq bilim oshaǵyna bardy. Qurylys jumystarynyń sapasyn tekserdi.
Úsh qabatty mektep 4 gektar aýmaqta boı kótergen. Bilim ordasy zamanaýı talaptarǵa saı jabdyqtalatyn. Onda pándik kabınetter, tehnologıalyq dáris berý bólmeleri, sport, akt zaldar, syrtqy sport alańshalar, keń de jaıly ashanasymen jabdyqtalyp, sáýlet-symbatymen kóz tartatyn úlgili bilim ordasyna aınalmaq. Búginde mektepke qajetti jabdyqtardy jetkizý jumystary qarqyndy júrgizilýde. Sondaı-aq, jańa mektep tabıǵı gazben jylytý júıesine qosylady. Sonymen qatar mektep aýmaǵyn abattandyrý, jasyl jelekter otyrǵyzý jáne demalys aımaqtaryn qurý sharalary qolǵa alynǵan. Aralaý barysynda qurylysqa jaýapty
sala basshylary men merdigerlerge jumysty ýaqtyly ári sapaly aıaqtaýdy qatań tapsyrdy.
