Premer-ministr Oljas Bektenov Astana qalasy kásiporyndarynda metallýrgiia, jeńil jáne qurylys ónerkásibi, avtomobil jáne temirjol mashinasyn jasaý salalarynyń damýymen tanysty. Prezidenttiń «Ádiletti Qazaqstan: zań men tártip, ekonomikalyq ósim, qoǵamdyq optimizm» atty Joldaýynda aitylǵan ekonomikany ártaraptandyrý jáne basym salalardaǵy investitsiialyq jobalardy iske asyrý jónindegi tapsyrmalarynyń oryndalýy tekserildi, dep habarlaidy Dalanews.kz.
Indýstriialyq park aýmaǵynda Premer-ministrge Astananyń áleýmettik-ekonomikalyq damýy týraly baiandaldy. Qala ákiminiń orynbasary Evgenii Glotov birinshi jartyjyldyqtyń qorytyndysy boiynsha Astananyń JÓÓ kólemi 5,5 trln teńgege jetip, ótken jylǵy kórsetkishten 7%-ǵa asyp túskenin habarlady. Jalpy óńirlik ónim qurylymynda shaǵyn jáne orta biznestiń úlesi 72%-dy quraidy. Biylǵy 10 aida Astanaǵa shamamen 1,3 trln teńge investitsiia tartyldy, bul rette ónerkásiptik óndiris kólemi 2023 jylmen salystyrǵanda shamamen 7%-ǵa ósti.
Premer-ministr 7,5 myń sharshy metr aýmaqta ornalasqan «Digital System Service» JShS zaýytynyń óndiristik tsehtaryn aralap kórdi. Telekommýnikatsiia jabdyqtaryn, onyń ishinde modemderdi, kommýtatorlardy, baǵdarlaýyshtardy, telefon apparattary men úide, keńsede jáne ónerkásiptik paidalanýǵa arnalǵan stansalardy shyǵarý jolǵa qoiylǵan. Zaýytta baǵdarlamalyq jasaqtamany ázirleýden bastap daiyn ónimdi jinaýǵa jáne oraýǵa deiin óndiristiń tolyq tsikli júzege asyrylady. Premer-ministrge jańǵyrtýdan keiin kásiporynnyń qýaty jylyna 720 myń birlikke deiin óskeni, onyń kólemin 805 myń qurylǵyǵa deiin ulǵaitý múmkindigi týraly baiandaldy. 2005 jyly ashylǵan sátten bastap zaýytty damytýǵa salynǵan investitsiialardyń jalpy somasy shamamen $4,5 mln-dy qurady. Búgingi tańda óndiris 100 qyzmetkerdi turaqty jumyspen qamtamasyz etedi.
Oljas Bektenov importqa táýeldilikti azaitý jáne joǵary tehnologiialyq ónimniń eksportyn ulǵaitý maqsatynda jaǵdai jasaý úshin mundai óndiristerdiń mańyzyn atap ótti. Qazirgi ýaqytta Digital System Service taýarlar jelisi Qazaqstan naryǵynda keńinen usynylǵan. Kompaniianyń damý josparynda sheteldik naryqqa shyǵý qarastyrylǵan, onyń ishinde Ózbekstan, Ázerbaijan, Qyrǵyzstan, Resei, Arab elderi bar.
Amerikalyq Wabtec kompaniiasynyń investitsiialyq jobasy arqyly Oljas Bektenov temirjol mashinasyn jasaý salasynyń damýymen tanysty. «Lokomotiv qurastyrý zaýyty» magistraldyq teplovozdardy qurastyrý kásiporny jylyna 120 birlikke deiin shyǵarady. Óndiris bastalǵannan beri barlyǵy 611 lokomotiv jinaldy. Kompaniia prezidenti Marat Tileýbaev Premer-ministrge zaýytta barlyq negizgi qurastyrý toraptary igerilgenin, lokalizatsiia deńgeii búginde 75%-ǵa jetkenin baiandady. Jobaǵa salynǵan investitsiialardyń jalpy somasy – 30 mlrd teńge. Kásiporynda 742 jumys orny ashyldy.
Premer-ministr temir jol mashinasyn jasaýdy damytýǵa, jańa óndiristik jáne servistik obektilerdi qurýǵa investitsiialardyń ósýiniń oń úrdisterin atap ótti. Mundai jobalardy iske asyrý Memleket basshysynyń alǵa qoiǵan mindetine sáikes Qazaqstannyń kólik-logistikalyq hab retinde qalyptasýyna yqpal etedi.
Oljas Bektenov «Ashina KZ» JShS tigin fabrikasynda jeńil ónerkásiptiń damýymen tanysty. Kásiporynnyń jyldyq qýaty – 24 myń birlik ónim. Jobanyń quny 1,4 mlrd teńgeni quraidy, 60 jumys orny ashyldy.
Sondai-aq jumys sapary barysynda Oljas Bektenov «Taý-Ken Altyn» JShS affinaj zaýytynda boldy. Kásiporyn joǵary sapany qamtamasyz ete otyryp, altyn men basqa da baǵaly metaldardy qospalardan tazartýmen ainalysady. Zaýyt TMD-da teńdesi joq ozyq affinaj tehnologiialary boiynsha jumys isteidi, bul álemdik standarttarǵa sáikes keletin ónimderdi shyǵarýǵa múmkindik beredi. Kásiporyn iske qosylǵan sátten bastap barlyǵy 336,7 tonna tazartylǵan altyn jáne 64,2 tonna kúmis óndirildi, jyldyq qýaty 25 tonna altyn men 50 tonna kúmiske jetedi. «Taý-Ken Altyn» JShS direktory Ainur Aidarhanov zaýyt energiia tutyný, sý men jylý shyǵynyn azaita otyryp, ESG-qaǵidattaryn belsendi engizgenin, sondai-aq katalizatorlar men qaldyqtardy qaita óńdeýdi damytyp jatqanyn aitty. Bul shikizat bazasyn keńeitýge ári naryqtaǵy ustanymdy nyǵaitýǵa múmkindik beredi.
Premer-ministr zaýyttyń qyzmeti Qazaqstannyń baǵaly metaldardyń álemdik naryǵyndaǵy ustanymyn nyǵaitýǵa yqpal etetinine toqtaldy. Jalpy, mundai óndiristik jobalar el ekonomikasyn ártaraptandyrý jónindegi strategiiany iske asyrýda sheshýshi ról atqarady.
«Memleket basshysy elimizdiń ónerkásiptik áleýetin tolyq ashý mindetin qoidy. Bizde bul úshin barlyq múmkindikter men qajetti quraldar bar. Qolaily jaǵdailary bar osyndai indýstriialyq parkter ónerkásip sektorynyń damýyna yqpal etedi. Búgingi tańda Qazaqstanda ártúrli salalyq baǵyttaǵy 14 arnaiy ekonomikalyq aimaq jáne 20-dan astam indýstriialyq aimaq jumys isteidi. Biz bul tájiribeni jalǵastyramyz ári keńeitemiz. Bizdiń mindetimiz – joǵary deńgeide qaita óńdeýdi damytý, otandyq shikizatty tiimdi paidalaný jáne qaita óńdeý, sondai-aq iri kásiporyndardyń ainalasynda sabaqtas óndiristerdi qalyptastyrý. Importqa táýeldilikti tómendetip qana qoimai, qosylǵan quny aitarlyqtai joǵary ónimderdiń eksportyn arttyrý úshin jańa múmkindikter jasaý mańyzdy», — dep atap ótti Oljas Bektenov.
