Juma kúngi saýda-sattyq qorytyndysy boiynsha ulttyq valiýtaǵa shaqqandaǵy 1 AQSh dollary 3,61 teńgege qymbattap, baǵam 498,59 teńge deńgeiinde belgilendi. Al búginderi aqsha aiyrbas oryndarynda atalǵan shetel valiýtasy 500-503 teńge aralyǵynda satylýda. Qazaqstan qarjygerleri qaýymdastyǵynyń sarapshylary ulttyq valiýta baǵamynyń bulaisha álsireýine ne túrtki ekenin túsindirdi, dep habarlaidy Dalanews.kz.
"Bul rette saýda-sattyq kólemi aitarlyqtai artyp, 257,1 mln dollardy qurady, al bul kólem aldyńǵy sessiiada ǵana 184,2 mln dollar bolǵan. Osy jaǵynan alǵanda, syrtqy faktorlardyń tutastai alǵanda teńgege esh áseri bolmady, óitkeni munai baǵasy men AQSh dollary indeksiniń bir mezgilde ósimi baiqaldy. Tiisinshe, ulttyq valiýtanyń álsireýi ishki faktorlarǵa bailanysty boldy. Jalpy, kvazimemlekettik sektordyń valiýtalyq kirisiniń 50%-yn teńgede ustaýdyń qaita mindettelýinen kútilgen oń áserge kóp úmit artýdyń qajeti joq sekildi. Óitkeni bul rettegi usynystyń ulǵaiý kólemi shamaly bolýy múmkin (qazan aiynda saýda-sattyqtyń jiyntyq kólemi 6,1 mlrd dollar boldy, ondaǵy úles aiyna shamamen 300 mln dollar)", - deidi Qazaqstan qarjygerleri qaýymdastyǵynyń sarapshylary.
Sondai-aq sarapshylar shikizat naryǵyndaǵy koniýktýranyń sál nasharlap, reseilik rýbldyń toqtaýsyz quldyraýy da otandyq valiýta naryǵyna azdap áser etkenin aitady.
"Qaita, osy syrtqy faktorlardy valiýta naryǵy biýdjet tranfertin qamtamasyz etý operatsiialary boiynsha Ulttyq qor tarapynan shetel valiýtalary aiyrbasynyń turaqty usynysy, kvazimemlekettik sektor sýbektileriniń shetel valiýtasyndaǵy tabys aqsha aiyrbasy, sondai-aq salyqtyq kezeńniń arqasynda onsha sezbedi", - deidi olar.
Sońǵy aptada Reseide 1 AQSh dollary 90-nan 100 rýblge deiin bir-aq kóterildi. Sarapshylar bul baǵam jaqyn kúnderi 130 rýblge barýy múmkin ekenin boljaýda. Árine, buǵan geosaiasat, sonyń ishinde AQSh-tyń Reseidiń qarjy infraqurylymyna salǵan kezekti sanktsiiasy, sondai-aq shetel valiýtasyna belgilengen joǵary mólsherlemeniń áseri bar. Rýbldi álsiretýge múddeli eksportshylar men biýdjet bolyp tabylatyny da aitylady.
Aita ketsek, qarasha aiynda dollar nege kúsheiip jatqany týraly aldynda sarapshy-maman pikirin taǵy usynǵan bolatynbyz.
