جۇما كۇنگى ساۋدا-ساتتىق قورىتىندىسى بويىنشا ۇلتتىق ۆاليۋتاعا شاققانداعى 1 اقش دوللارى 3،61 تەڭگەگە قىمباتتاپ، باعام 498،59 تەڭگە دەڭگەيىندە بەلگىلەندى. ال بۇگىندەرى اقشا ايىرباس ورىندارىندا اتالعان شەتەل ۆاليۋتاسى 500-503 تەڭگە ارالىعىندا ساتىلۋدا. قازاقستان قارجىگەرلەرى قاۋىمداستىعىنىڭ ساراپشىلارى ۇلتتىق ۆاليۋتا باعامىنىڭ بۇلايشا السىرەۋىنە نە تۇرتكى ەكەنىن ءتۇسىندىردى، دەپ حابارلايدى Dalanews.kz.

"بۇل رەتتە ساۋدا-ساتتىق كولەمى ايتارلىقتاي ارتىپ، 257،1 ملن دوللاردى قۇرادى، ال بۇل كولەم الدىڭعى سەسسيادا عانا 184،2 ملن دوللار بولعان. وسى جاعىنان العاندا، سىرتقى فاكتورلاردىڭ تۇتاستاي العاندا تەڭگەگە ەش اسەرى بولمادى، ويتكەنى مۇناي باعاسى مەن اقش دوللارى يندەكسىنىڭ ءبىر مەزگىلدە ءوسىمى بايقالدى. تيىسىنشە، ۇلتتىق ۆاليۋتانىڭ السىرەۋى ىشكى فاكتورلارعا بايلانىستى بولدى. جالپى، كۆازيمەملەكەتتىك سەكتوردىڭ ۆاليۋتالىق كىرىسىنىڭ 50%-ىن تەڭگەدە ۇستاۋدىڭ قايتا مىندەتتەلۋىنەن كۇتىلگەن وڭ اسەرگە كوپ ءۇمىت ارتۋدىڭ قاجەتى جوق سەكىلدى. ويتكەنى بۇل رەتتەگى ۇسىنىستىڭ ۇلعايۋ كولەمى شامالى بولۋى مۇمكىن (قازان ايىندا ساۋدا-ساتتىقتىڭ جيىنتىق كولەمى 6،1 ملرد دوللار بولدى، ونداعى ۇلەس ايىنا شامامەن 300 ملن دوللار)"، - دەيدى قازاقستان قارجىگەرلەرى قاۋىمداستىعىنىڭ ساراپشىلارى.

سونداي-اق ساراپشىلار شيكىزات نارىعىنداعى كونيۋكتۋرانىڭ ءسال ناشارلاپ، رەسەيلىك رۋبلدىڭ توقتاۋسىز قۇلدىراۋى دا وتاندىق ۆاليۋتا نارىعىنا ازداپ اسەر ەتكەنىن ايتادى.

"قايتا، وسى سىرتقى فاكتورلاردى ۆاليۋتا نارىعى بيۋدجەت ترانفەرتىن قامتاماسىز ەتۋ وپەراسيالارى بويىنشا ۇلتتىق قور تاراپىنان شەتەل ۆاليۋتالارى ايىرباسىنىڭ تۇراقتى ۇسىنىسى، كۆازيمەملەكەتتىك سەكتور سۋبەكتىلەرىنىڭ شەتەل ۆاليۋتاسىنداعى تابىس اقشا ايىرباسى، سونداي-اق سالىقتىق كەزەڭنىڭ ارقاسىندا ونشا سەزبەدى"، - دەيدى ولار.

سوڭعى اپتادا رەسەيدە 1 اقش دوللارى 90-نان 100 رۋبلگە دەيىن ءبىر-اق كوتەرىلدى. ساراپشىلار بۇل باعام جاقىن كۇندەرى 130 رۋبلگە بارۋى مۇمكىن ەكەنىن بولجاۋدا. ارينە، بۇعان گەوساياسات، سونىڭ ىشىندە اقش-تىڭ رەسەيدىڭ قارجى ينفراقۇرىلىمىنا سالعان كەزەكتى سانكسياسى، سونداي-اق شەتەل ۆاليۋتاسىنا بەلگىلەنگەن جوعارى مولشەرلەمەنىڭ اسەرى بار. ءرۋبلدى السىرەتۋگە مۇددەلى ەكسپورتشىلار مەن بيۋدجەت بولىپ تابىلاتىنى دا ايتىلادى.

ايتا كەتسەك، قاراشا ايىندا دوللار نەگە كۇشەيىپ جاتقانى تۋرالى الدىندا ساراپشى-مامان پىكىرىن تاعى ۇسىنعان بولاتىنبىز.