قىتايدىڭ ۋسي قالاسىندا ءوتىپ جاتقان 2025 جىلعى الەم چەمپيوناتى اياسىندا World Taekwondo جانە قازاقستاندىق «توو Integra Construction» كومپانياسى ءۇش جىلدىق سەرىكتەستىك كەلىسىمگە قول قويدى. بۇل ارىپتەستىك تاەكۆوندونى الەمدىك دەڭگەيدە دامىتۋعا جانە بەيبىتشىلىك، بىرلىك، ينكليۋزيۆتىلىك سياقتى نەگىزگى قۇندىلىقتارىن ناسيحاتتاۋعا باعىتتالعان.
كەلىسىمگە World Taekwondo پرەزيدەنتى دوكتور چۋنگۆون چوۋ جانە قازاقستان تاەكۆوندو فەدەراسياسىنىڭ (WT) پرەزيدەنتى، «Integra Construction KZ» باقىلاۋ كەڭەسىنىڭ ءتوراعاسى كۇدرات شامييەۆ قول قويدى.
كەلىسىم بويىنشا «Integra Construction KZ» الەمدىك تاەكۆوندونى دامىتۋعا، سپورت پەن الەۋمەتتىك باستامالاردى قولداۋعا باعىتتالعان World Taekwondo باعدارلامالارىنا قارجىلاي قولداۋ كورسەتەدى.
قاراجات «بارشاعا ارنالعان تاەكۆوندو» جوبالارىنا، بوسقىندارمەن ىنتىماقتاستىق باعدارلامالارىنا جانە جاستارعا ارنالعان ءبىلىم بەرۋ باستامالارىنا جۇمسالادى.
سونىمەن قاتار، سەرىكتەستىك «Integra Construction» كومپانياسىنا 2026–2027 جىلدارى وتەتىن World Taekwondo حالىقارالىق جارىستارىندا كەڭ ماركەتينگتىك مۇمكىندىكتەر بەرەدى. برەندتى الەمدى ارەنالاردا، تىكەلەي ەفيرلەردە جانە سيفرلىق مەديا الاڭداردا تانىستىرۋ كومپانيا ءۇشىن ماڭىزدى قادام.
كۇدرات شامييەۆ:
«ءبىز ءۇشىن بۇل تەك سپورتتىق كەلىسىم ەمەس، بۇل قازاقستان مەن كورەيا اراسىنداعى دوستىق پەن ءوزارا سەنىمنىڭ نىشانى. ءبىز تەك ينفراقۇرىلىم سالمايمىز، سونىمەن بىرگە ەلدەر اراسىنداعى سەنىم كوپىرلەرىن قۇرامىز. بۇل سەرىكتەستىك قازاقستاننىڭ اشىقتىعىن جانە تۇراقتى دامۋ مەن ESG كورسەتكىشتەرىن جاقسارتۋعا ۇمتىلىسىن كورسەتەدى».
كەلىسىم اياسىندا قازاقستان الەمدىك تاەكۆوندو ورتالىعىنا اينالا بەرەدى: 2026 جىلى استانادا WT گران-پري فينالى جانە WT Gala Awards سالتاناتى وتەدى، ال 2027 جىلى ەلوردا الەم چەمپيوناتىن قابىلدايدى.
ەسكە سالايىق، «توو "Integra Construction KZ"» — 1998 جىلى قۇرىلعان، قازاقستانداعى جەتەكشى قۇرىلىس كومپانيالارىنىڭ ءبىرى. كومپانيا تەمىرجول جانە اۆتوموبيل جولدارىن، ونەركاسىپتىك جانە ازاماتتىق نىسانداردى سالۋ جانە قايتا جاڭعىرتۋمەن اينالىسادى.
