Búginde Qazaqstan óziniń gýmanistik, demokratiialyq jáne tolerantty sipatymen erekshelenedi. Sonyń aiqyn bir kórinisi – ultaralyq tatýlyq pen kelisimdi saqtaýdy aldyna maqsat etip qoiǵan Qazaqstan halqy Assambleiasynyń qurylýy. Mundai memlekettik organnyń qajettiligin tuńǵysh Prezident Nursultan Nazarbaev kórdi. Ol osy ideianyń bastamashysy bolyp, onyń qalyptasýyna jan-jaqty úles qosqanyn moiyndaýǵa tiispiz.
1992 jyly jeltoqsanda el táýelsizdiginiń mereitoiyna arnalǵan Qazaqstan halqynyń birinshi forýmy tarihi turǵydan Qazaqstan halqy Assambleiasynyń negizin qalady. Qoǵamdyq institýt 1995 jyly 1 naýryzda sol kezdegi Memleket basshysynyń jarlyǵymen Prezident janyndaǵy konsýltativtik-keńesshi organ retinde irge qalady. Assambleianyń basty maqsaty – Qazaqstannyń órkendeýine yqpal etý, sonymen qatar patriotizmdi, azamattyq biregeilikti, básekege qabiletti ultty damytý jáne elimizde ultaralyq kelisimdi ornatý. Onyń mártebesi men áleýmettik jaǵdaiy saiasi, quqyqtyq jáne zańdyq turǵydan ýaqyt óte kele qalyptasty. Osy oraida 2008 jylǵy 20 qazanda arnaiy qabyldanǵan «Qazaqstan halqy Assambleiasy týraly» Zańdy jáne Parlament Májilisine Assambleiadan ókilderdi (toǵyz depýtat) sailaýdyń erekshe mártebesin atap ótýge bolady.
Ár ulttyń jeke erekshelikteri, sol ulttyń birligin taný, qabyldaý mádeni qundylyqtar júiesin, tarihy men tilin erkin damytý arqyly júzege asady. Búginde elimizde 130-dan astam ult ókili bar, olar ana tilin úirenýge, baspasózge, buqaralyq aqparat quraldaryna qol jetkizýge múmkindik aldy, olar ózderiniń salt-dástúri men ádet-ǵurpyn osy kúnge deiin saqtai otyryp, ulttyq merekelerin erkin toilai alady.
Astanadaǵy Beibitshilik jáne kelisim saraiy esigin aiqara ashty, munda qoǵam qairatkerleri jii jinalyp, túrli etnos ókilderi bas qosyp turady. Assambleianyń naqty mindeti quqyqtyq negizde júielengen. Aitalyq:
- etnosaralyq qatynastar salasynda memlekettik organdarmen jáne azamattyq qoǵam institýttarymen tiimdi ózara is-qimyldy qamtamasyz etedi ári qoǵamda etnosaralyq kelisim men toleranttylyqty nyǵaita túsý úshin qolaily jaǵdai jasaidy;
- halyq birligin nyǵaitý, qazaqstandyq qoǵamnyń irgeli qundylyqtary boiynsha qoǵamdyq kelisimdi qoldaý men damytý;
- ekstremizm men radikalizmniń kórinisterine jáne adam men onyń quqyqtaryna, bostandyqtaryna qol suǵýǵa baǵyttalǵan áreketterge qarsy turýda memlekettik organdarǵa járdemdesý;
- demokratiialyq normalar negizinde azamattardyń saiasi jáne quqyqtyq mádenietin qalyptastyrý.
Búginge deiin Assambleia ózine júktelgen senim men mindetti jaýapkershilikpen atqaryp keledi. Uiymnyń belsendi músheleriniń arasynda patriottyq rýhty isterimen dáleldep júrgen azamattar da jeterlik. Túrli ult ókilderi memleket isine, ǵylymǵa, ádebietke, bilimge, ónerge, sportqa, bizneske keńinen atsalysyp júr.
Qazaqstan halqy, ony quraýshy qazaq ulty qashanda adamgershilikke toly qasietterimen erekshelendi
Nursultan Nazarbaev Qazaqstan halqy Assambleiasyn qura otyryp, qazaq halqynyń rýhani bolmysy qashanda adamgershiligimen, ishki tutastyǵymen erekshelenetinin anyq aitty.
«Qazirgi urpaqtyń ata-babadan qalǵan osynaý uly qasietten aiyrylýǵa qaqysy joq. Sondyqtan qazaqtyń ziialy qaýymyn, rýhaniiat qairatkerlerin, árbir qazaqty ulaǵatty ótkenniń murasyn umytpaýǵa shaqyramyn. Biz urpaǵymyzdy ózge yqpaldan qorǵaimyz, qateleskenderdi aqylǵa shaqyramyz, olardy kezdeisoq qadamdardan saqtandyrýymyz kerek», - dedi tuńǵysh prezident.
Táýelsizdikti jariialaýdyń bastapqy kezeńinde otarlaýdy eńsergen qazaq halqy óz jerlesterin taǵdyrdyń tálkegine qaldyrǵan joq. Ulttyq baýyrlastyqqa tárbieleý, Assambleianyń biregei institýtsionaldyq qurylym retinde ashylýy, memlekettik deńgeide ózge halyqtardyń damýyna jan-jaqty jaǵdai jasaý – álemde teńdesi joq tájiribe ekenin atap ótken jón.
Qazaqstan halqy Assambleiasy qurylǵan kúnnen bastap orasan zor áleýetti jinaqtap, halyq diplomatiiasy institýtynyń úlgisine beiimdelip, damýdyń uzaq jolyn júrip ótti. Elimizdegi 100-den astam etnostyń basyn biriktirgen biregei qurylym turaqtylyqty saqtap, respýblikanyń damýynda mańyzdy ról atqardy.
Qazaqstan halqy Assambleiasy Qazaqstannyń ultaralyq qatynastar salasyndaǵy saiasatynyń tabystylyǵyn búkil álemge pash etýde.
Jalpy, Assambleia jumysynyń arqasynda elimizde etnosaralyq jáne konfessiiaaralyq kelisimniń biregei úlgisi, árbir azamattyń óz quqyqtaryn tolyq paidalanyp, erkindikti sezine alýy úshin erekshe senim, yntymaqtastyq jáne ózara túsinistik atmosferasy qalyptasty. Árbir qazaqstandyqqa ulty men dinine qaramastan Konstitýtsiiamen kepildik berilgen.
Respýblikada Qazaqstannyń barlyq etnostarynyń mádenietin, tilin, salt-dástúrin damytý úshin barlyq qajetti jaǵdailar jasalǵan. Assambleia qyzmeti Qazaqstannyń ultaralyq qatynastar máselelerin tiimdi sheshetin memleket retindegi halyqaralyq bedelin arttyrýǵa yqpal etýde. Áli de osy qyzmetinen, múddesinen taimaityny anyq.
