Shahardyń tabiǵi tynysyna ainalǵan jasyl aýmaqty kúndelikti qadaǵalaýdy qadap aitty. Egilgen aǵashtardyń tamyr jaiyp, jersinýi úshin jumysty jan-jaqty, jumyla, janashyrlyqpen atqarýdy júktedi.
– Kógaldandyrý – kóptiń isi. Buǵan bárimiz qatysýymyz kerek. Búkil el bolyp, jabylyp, egilgen kóshetterdi kógertýge atsalysqan jón. Turǵyndar da jumylyp, janashyrlyq tanytsa. Sonshama eńbek zaia ketpesin. Ár aǵashtyń túbin tekserip shyǵyńdar. Sýarylǵan, tyńaitqysh qoldanylǵan bolsyn, – dedi oblys ákimi.
Túrkistan qalasyn abattandyrý úshin bólingen 32 sektorda 33 myń aǵash egilgen. Ár sektorǵa aýdan, qala ákimdikteri men basqarma basshylary tikelei jaýapty. 32 sektorda ártúrli aǵash otyrǵyzylǵan. Kósheler jaryqtandyrylyp, qoqys jáshikteri men turǵyndardyń demalýyna arnalǵan oryndyqtar ornatyldy. Sýburqaqtar qoiylyp, velojoldar tóselip, gazon egilgen. Apta saiyn 32 sektor aýmaǵynda aýdan, aýyldardan kelgen azamattardyń qatysýymen senbilikter uiymdastyrylýda. Qalany kórkeitý bir úlgide júzege asyp jatyr.
Klimaty tym qurǵaq Túrkistannyń aptap ystyq, ańyzaq jelinde jasyl jelekti jaiqaltýdyń aýyrlyǵyn bilikti ǵalymdar da talai aityp keledi. Óitkeni egilgen kóshetterdiń ózge óńirlermen salystyrǵanda jersinýi tym tómen. Kóshettiń jersiný kórsetkishi ózge óńirlerde 70 paiyzdy qurasa, Túrkistan aýmaǵyndaǵy deńgeii 50%-dan aspaidy.
