Túrkistan qalasynda biyl Ońtústik Koreianyń «Woosong» ýniversitetiniń filialynyń ashylýy josparlanyp otyr,- dep habarlaidy Dalanews.kz
«Kongress holl» kópsalaly kesheninde Qazaq-Korei halyqaralyq bilim ordasynyń tanystyrylymy ótti. Jiynǵa Túrkistan oblysy ákiminiń orynbasary Beisenbai Tájibaev, «Woosong» ýniversitetiniń ókilderi, ustazdar, ata-analar men bolashaq túlekter qatysty.
Basqosýda alǵysóz alǵan oblys ákiminiń orynbasary jastarǵa sapaly halyqaralyq bilim alýǵa úlken múmkindik týyp otyrǵanyn tilge tiek etip, túlekterdi berilgen múmkindikti tiimdi paidalanýǵa shaqyrdy.
"Qurmetti jiynǵa qatysýshylar! Búgin Ońtústik Koreianyń jetekshi joǵary oqý oryndarynyń biri – «Výsong» ýniversiteti filialynyń Túrkistan qalasynda ashylýyna orai, tolyq aqparat berý úshin ýniversitet ókilderi aldaryńyzǵa kelip otyr. Bul bastama – Túrkistandy bilim men ǵylymnyń ortalyǵyna ainaldyrý jolyndaǵy mańyzdy qadam, jastarymyzǵa sapaly halyqaralyq bilim alýǵa berilgen tamasha múmkindik. Bul ýnivestitettiń ashylýy – bizdiń óńirdegi bilim berý salasynyń jańa deńgeige kóterilýiniń aiqyn dáleli. Munda tek joǵary deńgeili akademiialyq bilim ǵana emes, Ońtústik Koreianyń zamanaýi tehnologiialary men tájiribelik oqytý ádisteri de usynylmaq. Sizderdiń aldaryńyzda úlken múmkindikter ashylyp otyr. Atalǵan ýniversitetke ministrlik jáne Túrkistan oblysy ákimdigi tarapynan granttar bólý máselesi qazirden josparlanyp, qajetti sharalar qabyldanýda. Biz, oblys basshylyǵy, jastarymyzdyń sapaly bilim alyp, ózderin jan-jaqty damytýyna barlyq jaǵdaidy jasaýǵa daiynbyz. Tek úzdik bilim ǵana tabysty bolashaqtyń kepili. Sizderdi osy múmkindikti tiimdi paidalanýǵa shaqyramyn!",– dedi Beisenbai Tájibaev.
Jiynda Ońtústik Koreianyń Halyqaralyq ister departamentiniń dekany Shim Hek Chje bastaǵan «Woosong» ýniversitetiniń ókilderi Koreia eliniń álemdik deńgeidegi ornyna toqtalyp, ýniversitettiń tynys-tirshiligin tanystyrdy. Qatysýshylardyń suraǵyna jaýap berip, bilim ordasy beretin múmkindikter týraly aqparattandyrdy.
Prezident Qasym-Jomart Toqaevtyń el aýmaǵynda tanymal joǵary oqý oryndarynyń filialyn ashý týraly tapsyrmasy aiasynda oblysta birqatar jumystar atqarylýda. Túrkistan qalasy «oblys ortalyǵy» atanǵannan beri Halyqaralyq týrizm jáne meimandostyq ýniversiteti ashyldy.
Aqparattyq tehnologiialar salasynyń kadrlaryn daiarlaý maqsatynda Túrkistan qalasynda IT ýniversitetin ashý boiynsha Ońtústik Koreianyń «Výsong» bilim berý qorynyń ókilderimen kelissózder júrgizilip, búginde Ákimshilik-iskerlik ortalyǵynda ǵimarattyń kúrdeli jóndeý jumystary atqarylýda. Bul ýniversitet – bilim men ǵylymnyń, mádeniet pen tájiribeniń toǵysatyn jańa ortalyǵy bolmaq. Stýdentter álemdik deńgeide bilim alyp qana qoimai, halyqaralyq tájiribeden ótýge, eńbek naryǵynda suranysqa ie maman atanýǵa múmkindik alady. Odan bólek, «qos diplom» baǵdarlamasymen bilimin Koreia elinde jalǵastyrý, sol elde jumysqa ornalasý múmkindigi qarastyrylǵan.
Bul bastama QR Ǵylym jáne joǵary bilim ministrliginiń tikelei atsalysýymen júzege asyrylýda. Jaqynda halyqaralyq ýniversitet ókilderi QR Ǵylym jáne joǵary bilim ministri Nurbek Saiasatpen kezdesip, daiyndyqtardy pysyqtamaq.
Halyqaralyq ýniversitette 4 fakýltet ashylady. Onda «Jasandy intellekt jáne úlken aqparattar taldaýy», «Baǵdarlamalyq qamtamasyz etý», «Álemdik tórtinshi IT ónerkásiptik revoliýtsiia», «Mýltimediia jáne Web dizain» mamandyqtary boiynsha 2340 stýdent bilim alady dep josparlanýda. Ýniversitettiń ashylýy 2025 jyldyń kúzine josparlanýda.
Aita keteiik, Túrkistan oblysynda jalpy 1088 mektepte 553 myńnan astam oqýshy bilim alady. Biyl óńirde mektep bitirýshi túlekterdiń sany 33 myńnan asady. Olardyń 23 myńǵa jýyǵy joǵary oqý oryndaryna túsýge nietti. Ótken jyly eńbek naryǵynyń qajettilikterin eskere otyryp, Túrkistan oblysy ákimdigi tarapynan grant bólindi. Nátijesinde, Q.A.Iasaýi atyndaǵy Halyqaralyq qazaq-túrik ýniversitetinde 12 mamandyq boiynsha 107 stýdent grant negizinde bilim alýda.
