Qyrǵyzstandyq sarapshy eldegi blogerlerdiń jaǵdaiyna qatysty pikir bildirdi, - dep habarlaidy Dalanews.kz 24.kg basylymyna silteme jasap.
Qyrǵyzstannyń Salyq qyzmetiniń basshysy Almambet Shyqmamatovtyń aitýynsha, eldegi blogerler shyǵarmashylyq indýstriialar parkiniń rezidenti atanyp, arnaiy nemese jalpy salyq rejimin tańdaýǵa quqyly.
«Blogerlerge salyq jaǵynan qysym kórsetpeýimiz kerek dep sanaimyn. Olar qoǵamda mańyzdy áleýmettik ról atqarady», – dedi Shyqmamatov.
Onyń málimetinshe, park rezidentteri 15 jyl boiy saqtandyrý jarnalarynan bosatylady. Jalpy salyq rejimin tańdaǵan jaǵdaida olar jaldamaly qyzmetkerlerdiń tabysynan 5 paiyz mólsherde tabys salyǵyn tóleýge mindetti, al rezident emester úshin bul kórsetkish - 10 paiyz.
Arnaiy salyq rejimin (biryńǵai salyq negizindegi jeńildetilgen júie) tańdaǵan blogerler 2027 jylǵa deiin kiristeriniń 1 paiyzyn, al odan keiin 2 paiyzyn salyq retinde tóleidi. Sonymen qatar, olar 5 paiyzdyq tabys salyǵyn da tóleýge tiis.
«Bul - óte qolaily jaǵdai. Al salyqtan tolyq bosatý durys sheshim emes», – dep naqtylady Shyqmamatov.
Salyq qyzmeti basshysynyń pikirinshe, bloging – endi ǵana damyp kele jatqan qyzmet salasy. Onyń aitýynsha, Qyrǵyzstandaǵy bloging naryǵy Resei men Qazaqstanǵa qaraǵanda áldeqaida shaǵyn, jergilikti blogerlerdiń tabysy da aitarlyqtai tómen.
«Kóptegen bloger aqparat taratyp, aǵartýshylyqpen ainalysady. Al qazirgi kúizelis jaǵdaiynda oiyn-saýyq kontenti de qoǵamnyń psihologiialyq turaqtylyǵy úshin mańyzdy ról atqarady. Jastar blogerlerdiń ómirin baqylap, olardy úlgi tutqany durys. Bul olardyń túrli ekstremistik aǵymdardyń yqpalyna túsýiniń aldyn alady. Sondyqtan blogosferanyń damýyn qos qoldap qoldaimyn. Ártúrli qyzyq, tanymdyq ári motivatsiialyq kontent jasaityn blogerler kóp bolsyn. Al memleket olarǵa seriktes ári qoldaýshy bolýy kerek», – dep túiindedi Almambet Shyqmamatov.
